المشاركات
المفقود/ حسين الفضالة
السفير الإيرانييا أخي بقتوا قلنا فساد
وحنا عيال البلد وبنحارب الفساد ان شاء الله
أفسدتوا
قلنا مصرين على البوق
قسمتوا البلد
لعبتوا بتركيبته
فضلتوا الحرامي على السنع
علشان يساعدكم على السرقات والسنعين يضرونكم
يا اخي ما اكتفيتوا!؟
ناقصكم فلوس؟
لا من رياضة ولا خدمات اساسية والاقتصاد بدربة الى الهلاك
ارحمونا الله يرحمكم ويانا!
كنا درة الخليج
ولاني قايل شصرنا
فشلتونا
أحرجتونا
غثيتونا!
هي سالفة حقد على الشخص الكويتي والا شنو بالضبط؟
أكثر من ولاء الكويتي وحبة لديرتة والله ما شفت بالدنيا كلها بالرغم من الظيم اللي يشوفه!
كل ما نوصل مستوى جديد من الانحطاط تشوفون أن الكويتي كلاه تقولون "يالله خل نزيد"؟
ليش؟!
بالذمة ليش؟!
حكومتنا ضدنا ليــــــــــــــــــــــــــــــش؟!
بالأسعار واقفة مع التجار
بـ"ممتلكات الدولة" دايسة على الناس ومخلية الكبار
يا اخي نبي نحبكم
والله نبي نحبكم
ساعدونا !!!!!!
وين ما الواحد يطالع يلقى اللي يسحن الكبد!
طبعا لو الواحد ساكن بقصر ومعاملاته خالصة على مستوى الوزير ومصالحة تناطح مصالح الدولة كان ما حس هالاحساس
لكن مو كلنا شيوخ
ولا تجار
ولا عبيد شيوخ
ولا حرامية
غصب نصير حرامية؟
يا اخي مو كل البلد حرامية
ستر من الله
آخر ما وصلت فيكم
ترخصون الكويتي
بالخارج اذا الواحد فينا وقع عليه ظلم أو مسته الحاجة ما له الا السفارة السعودية والا الاماراتية!؟
الله يعطيهم ألف عافية
لكن ديرتنا وينها
حكومتنا وينها
فلوسنا وينها؟
كويتي مفقود ووزيركم يدري انه بايران ما تحركتوا؟
همكم تحرصون على نواب اللي المفروض نواب "الأمة" ما يحرجونكم
لأنكم ما تقدرون تسوون شيء
ندري
من رداكم
لكن على الأقل ورونا انكم "تبون تسوون" شيء
لا حول ولا قوة الا بالله العلي العظيم
حلت مجالس على أقل من أرواح الناس
شطيتوا الحكومة وكل اقلامكم بالصحف على أقل
صرفتوا اموال الدنيا على الانتخابات وشراء الاصوات
روح بني آدم... كويتي... أب... ابن... مسلم... ما دريتوا عنها!!!
وصلت فيكم ترخصونا؟!
حسين الفضالة بعد الله منو له اذا ديرته ردية؟
اليوم حسين بكره منو!؟
يا ناس حسين ممكن يكون انت بكره لا قاله الله
والا ابوك
والا احد عيالك
والا على الاقل جارك أو رفيجك
استرخصونا الرخاص
المصفاه الرابعة لأن فيها فلوس لكم سويتوا البنك الدولي ما يفهم
لا انتوا ابو الفهامية
ما تشوفون الديرة مثل العسل!؟
والكلام داير على الضرايب... في بلد نفطي... شعبة ما تعدى حتى المليون!
انروح يعني للسفارة السعودية؟
والا ننخي شيخ اماراتي؟
تعرفون شنو النخوة؟
آه يا حسين
نتزين بالكلام عن شهداؤنا ونكذب على روحنا
وبالصجية ابوي ما يقدر ولا حتى على امي!
آه يا حسين
الله يكون بعونك
الله يكون بعون أهلك
الله يكون بعون عيالك
الله يلعن الردى والردي!
وين وصلتي يا كويت
الرجل يدمع دم
والوزير بالشاليه
والعضو يمر بيت فلان ياخذ فلوس
الفساد شيء
والتعمد فيه شيء
واسترخاص ارواح البشر شيء ثاني!
وين بتوصلونا؟
