ويــك انــد حسيــن

اليوم اللي رايح الديوانية واللي رايح الشالية واللي اساسا مسافر سياحه... يا ترى حسين شلون الويك اند وياه؟ وشلون الويك اند ويا عيالة؟

هو بإيران؟ والا بنص البحر؟ شلون حاله؟ شلون صحته؟

يا حكومة ترى مو عيب نستنجد فيكم. انتوا مو حكومتنا!؟ اعتبروا الموضوع استجواب لواحد منكم... سووا شغلكم اللي انتو تعرفونه. دهنوا سيور، سووا مكالماتكم، حركوا الموضوع بالاعلام "الكويتي"، بينوا لنا انكم دارين ان عندكم اسير كويتي. ياما اهتميتوا بمواضيع تافهة... هذا بني آدم. انتو مو بشر!؟ لو وزير كان حتى لو ما قدرتوا "توبكون" السالفه له كان حولتوه على وزارة ثانية والا كلش كلش مستشار بالديوان الأميري.

نعطي اللي يسوى واللي ما يسوى فلوس... عطوهم. نبطل الراديو والتلفزيون ما نسمع الا فلان قابل فلان والا فلان سوى كذ مو كأنه فقدان رجل كويتي خبر يهم الناس. صرنا مطقاقه للي يسوى واللي ما يسوى.

يا وزير الخارجية واللي يرحم والديك تحرك. يا وزير الداخلية السوبرمان سو شيء. يا حكومة استحوا. يا نواب الشعب وينكم؟ يا بو خمسين دينار ويا بو الدواوين صوتكم وينه؟ والا بو التأبين للبناني الفاطس انتوا بالذات علاقتكم خاصة مع السفير الإيراني بالكويت والا نسيتوا؟

الكويتي بالخارج لما يصير له شيء ما له الا السفارة السعودية والا الإماراتية يعينونه بعد الله سبحانه. الحين الكويتي بديرته هم مو دارين عنه. محد درى عن الشعب الا الشعب. انتوا شنو وظيفتكم؟ غير عن قانون الانترنت طبعا.

يا أهل حسين... يا ابوه وامه، يا زوجته ويا عياله. الله يكون بعونكم. والله قلوبنا وياكم ومستحين من القصور. قاعدين نسوي اللي علينا على مستوانا المتواضع لكن عمك أصمخ.

كل ما جيت ألعب مع عيالي أفكر بعيال حسين. كل ما قمت آكل أفكر حسين شنو أكله؟ قاعد ياكل أصلا والا لأ؟ ذكرى الغزو بعد يومين والكل بيتغزل بالأسرى والوطنية. بدال هالكلام الفاضي الماخوذ خيره نبي فعل. كل ما بغيت أكتب عن شيء أتذكر حسين أهم.

يا حسين عسى الله يكون بعونك ويسهل دربك ويرجعك سالم لأهلك وديرتك.

ويا أهل حسين... سامحونا.

وان ما قدرتوا ما تنلامون.

لا حول ولا قوة الا بالله العلي العظيم

للتفاصيل: مدونة الاستاذ حمام