24‏/02‏/2008

نتغصب الفرحه



كل عام والكويت واهلها الطيبين بخير وصحه وعافيه.
متمني من الغفور الرحيم ان يمن بنعمة الستر علينا وعليكم وعلى هذا البلد المسكين.

هناك من أكبرها وأسمنها من دام على بيع الكويت ويتحلى بلسانه لها. ومسئولين يسرقونها ليل نهار ويرفعوا علمها. وهناك من يشارك بمخيمات حزب اللات وعلى ارض الكويت بعد ويتغلغل بين من قاموا بمسيرات احتفال بأعياد الكويت "الوطنية". مسكينة يا كويت.

حتى الكثير من محبيينها الفعليين مخدوعين بذاك الشخص أو بتلك الحركة أو هذا التيار. فن صيغة الكلام واللوي بالفكر من أسلحة السياسة وتبقى فقط النية. لا يعلم النية إلا الله سبحانه ولكن الكويت مجتمع صغير وكل يعرف "اخَيَيه". لك الله يا كويت.

الوطنية ليست برفع الأعلام. وليست بتمجيد الصور. وليست بالتباهي أمام "الناس". الوطنية بالقلب وبالفعل الشريف. الوطنية قول وفعل. الوطنية ليست فقط بيومين في فبراير. الوطنية انك تواجه من حارب بلدك: من خائن ولائه لغير الكويت كما من مرتدين عباة الدين لجر الكويت الى الخلف والتخلف ومن يرك على مقاعد مجلس أمتها ويده بمخابي الفساد دون أي قيم ووو الخ. الله الساتر الحافظ ياكويت.

لا لليأس ولا للاستسلام لا بركة في ابن بلد ما برها. الكويت ومنذ كم سنة طفح بها الكيل وتحركت الأغلبية الصامته لنصرها بمختلف الميادين ولكن للزمان حكم. لم نأتي التدوين إلا لقول كلمة الحق ونصر الكويت.

نصر الكويت يكون عن طريق تفوق كل أهلها في مختلف اعمالهم, وعدم السكوت على الباطل, وفي تشجيع الثقافة, وفي أداء الواجب. كل هذه الصفات أمرنا بها الدين الحقيقي قبل الوطنية فلا تعارض بينهم.

كل عام وديرتي واهلها بخير.

احتفلوا بالكويت في كل ايامها. تراها امانه في ارقابنا كلنا.


يا ديرتي عسى الله يحفظك ويخليــــك
يا ديرتي وعدك نحارب العابث فيـــك
يا ديرتي وديرة اهلي وديرة محبيــــك
يا ديرتي عسى عيني بالدمع ما تبكيـك
يا ديرتي إلا بدمي اللي بعروقي اهديك
....................... يا ديرتي
.

هناك 25 تعليقًا:

bass يقول...

عيدي يا كويت يا أحلى بلد


ما أجمل الكويت و ما أجمل أعيادها

كل عام و الكويت لألف خير و أهلها و من يحبها


دمت بخير

KQ8 يقول...

كل عام وانت بخير

المهم انه تم اظهار بعض الفئات "الودره" وتبيانهم لبعض الغافلين ..واتفق معك بجملتك التالية"الوطنية انك تواجه من حارب بلدك: من خائن ولائه لغير الكويت كما من مرتدين عباة الدين لجر الكويت الى الخلف والتخلف ومن يرك على مقاعد مجلس أمتها ويده بمخابي الفساد دون أي قيم

"

وما نقول الا حسبنا الله ونعم الوكيل في كل من ارد بالكويت السوء..ويجعل كيده في نحره وتدبيره في تدميره

هذيان يقول...

كل عام وأنت بخير والعائلة بخير
والكويت عالية شامخة في ظل سيدي صاحب السمو أمير البلاد المفدى حفظه الله ورعاه
والشعب الوفي

كويــتي لايــعه كبــده يقول...

bass...

عيدي ونعيد معاك ياكويت

وانت بصحه وعافيه يا اختي الكريمه

كويــتي لايــعه كبــده يقول...

Krakatoa...

اي والله وقت الصجية تعرف ربعك منو.

وآمين على اللي قلته


Try to relax and listen to some smooth jazz or head out to Saudi for some Hungry Bunny :)

Take care buddy

كويــتي لايــعه كبــده يقول...

هذيان...

وانت بالف خير وعافيه اختي العزيزه

لا تحرقين قلبك زياده. ترى السالفه مطوله... عيدي من عيد الكويت يا بنت الكويت.

esTeKaNa يقول...

صدقت يا اخوي
عمر ما كانت الوطنيه علم نرفعه
واغنيه نغنيها
الوطنية اكبر من جذي
!!
كل شي يصير بديرتنا خيرة
تكشف لنا الصادق من الخبيث
الله يحفظ لنا ديرتنا
ودنا نحتفل
ودنا نفرح
بس القلب فيه غصه
:(
الله يحفظها ويصفي قلوب اهلها

كويــتي لايــعه كبــده يقول...

esTeKaNa...

آميــن

والغصه كبيره. عارفينهم من زمان بس الحين استقوو! طالت وشمخت.

تحياتي لحكومتنا الرشيده اللي ضنت انه ممكن تضرب بهم ناس ثانين من منطلق فرق تسد. والثمن الديره تدفعه!

عيدي يا كويت وانسي الهم يومين

وكل عام وانت بخير

enter-q8 يقول...

الغالي كويتي لا يعه جبده
و على ما اظن هالاسم ما يجب تحتكره على نفسك
لأن الغالبية من الكويتيين يحملون نفس لقبك و اصبح هالاسم حاله عامه اكثر من ماهو حاله فردية

كلامك هذا كان بمنتصف السبعينات

يمشي
اما اللحين

للأسف
من صادها عشى عياله

لما كانت الكويت

مجرد حمل هالاسم للشخص
هو أكبر مدعاه للفخر و الغنى والشرف

عندما قيل عن الكويت إنها ثالث الدول العظمي من احد الملوك العرب

بل كان الاجانب العرب
يتباهون اننا نقيم بالكويت او ياريت لو حصل لي عقد عمل بها

مع فائق تحياتي لقلمك

اخوك
خالد
و ايضا لايعه جبده

كويــتي لايــعه كبــده يقول...

يا هلا والله باخوي خالد

بالله منو فينا مو لايعه كبده؟
اللي يشوف ديرته تنحدر من مستوى الى الاسفل منه قدام عينه اكيد يحترق قلبه.

الولاء غريزه بالبشر والكن هناك من يمشي على اثنتان وليس بشر.

اما مقولة "من صادها عشى عياله" فهي من ابغض المعتقدات عندي. يستخدم هذا المفهوم الحيوانات بالغابه مكرم السامع. من يعمل حسب هذا المفهوم من البشر يعترف انه يعمل خطأ وبعذر ان هذا هو الدارج. وايضا يعترف ان الوضع العام فارط وما فيه حق "فاخذ اللي يطلع بايدك". ومن عاش بهالاسلوب هو اللي اموره ماشيه فالقيم اصبحت حمل ثقيل يمنع الواحد من الوصول. ان بغيت برهان فانظر الي اكثر اعضاء مجلس الامه ومجلس الوزراء والتجار فوقهم. اللي على قيم تعداه الدهر واللي لا قيم له اصبح رئيس مجلس الامه :) اما المحترمين من ابناء الوطن كلهم لاعة جبودهم!

نورتنا بزيارك ياخوي خالد
كرر الزياره ونورنا زياده

غير معرف يقول...

اللهم احفظ الكويت وشعبها في ظل سيدي حضرة صاحب السمو أمير البلاد المفدى الشيخ صباح الأحمد الصباح رعاه الله وأمده بموفور الصحة والعافية وكل عام و الكويت حرة شامخة, اللهم كل من أراد شرا بالكويت و أهلها رد كيده بنحره

كويــتي لايــعه كبــده يقول...

Anonymous...

آمين

As YoU LiKE يقول...

كلامك صحيح، فعلا الوطنية مو يومين .. الوطنية دوووم ..

كل عام والكويت واميرها وشعبها وانت بخير :)

Q8Disaster يقول...

عز الله انك صدقت

وكل عام وانتم بخير

كويــتي لايــعه كبــده يقول...

As YoU LiKE...

وانت بخير وصحه وعافيه ياللي حاط صورة شيخ الشيوخ :)

كويــتي لايــعه كبــده يقول...

Q8Disaster...

والله ادري ان هناك الكثير من اهل الكويت الطيبين مثلك وشرواك اللي يعرفون هالكلام.

وانت والديره بخير وستر ان شاء الله

bo rashed يقول...

صدقت والله نتغصب الفرحه


من اجمل التعابير اللي مرت علي بهاليومين

ويختصر اشياء وايد تقرقع بقلوبنا

عساكم عالقوه

وعمار ياكويت

vancouver يقول...

كل عام وانت بخير يارب




الفرحة بقلوبنا من اجل الكويت واعيادها
مثل ما الوطنيه بقلوبنا مو بالجنسيه اللي شايلينها



تسلم
:)

كويــتي لايــعه كبــده يقول...

bo rashed...

الله يقويك يابوراشد.

قلت مجرد اللي عالبال

وكل عام وانت بخير ياخوك

كويــتي لايــعه كبــده يقول...

vancouver...

وانت بخير وصحه وعافيه

والله يسلمك من الشر

ويديم عليك نعمة الفرحه والوطنيه

حيى الله اهل كندا :) شلون جوكم هالايام؟ برد ومطر (كانه ما في سايتات جويه على الانترنت)

بوتشخيص يقول...

كويتي ..

إقرى هالمقالة

http://alshahedkw.com/index.php?option=com_content&task=view&id=4484&Itemid=64

وشوف دشتي اشكاتب في مدونة الشباب
و أبي أعرف منو اللي قاعد بسوي فتنة الحين ؟

تحياتي

كويــتي لايــعه كبــده يقول...

butash5e9...

هلا فيك

دشتي منو؟ "بوشميس" اللي المقاله داست ابطنه؟! الكاتب خالد صالح العبيدي بمقالتة "بوشميس قام‮ ‬يصرف" ماقصر فيه وفضحة بتاريخه الاسود.

الكلام عن الطائفيه كلام فاضي والمقصود به "خلوهم يزيدون جرأه ويدوسون على راسكم وانتو اسكتو". ياكلون تبن (عزك الله) نحترم المحترم من كل طائفة اما الخونة فلن نترك لهم الساحة فارغه وسهله! لو بننطر الحكومه اللي اصلا قوتهم علينا وساكته على مخيمات تدريب حزب الات بالوفره مادري وين كان لي الحين عمك اصمخ! مو ما نزلنا الى هالحاله الرديه الا الحكومه الرشيده وسياساتها الحكيمه.

احنا نعرف من طلعنا على الدنيا منو الطائفي واتخاذ قراراته وتمويله من اي بلد ومواقفه الحقيقيه من التفجيرات ووقوف الكويت مع العراق بوجه نفوذ و الانتشار الشيعي بالخليج العربي (الى اليوم يقولون الكويت غلط بالوقوف ضد الدوله الام) وخطط التوسع والتغلغل المحليه داخل مناطق البلد ووووووو لسنا بغافلون وان كانت الحكومه مغفله. هم الطائفيين من اساس وولائهم لايران. اذا حتى حسني مبارك قالها! الحين وبعد ما استقوت عينهم زياده المطلوب منا الانبطاح بالكامل!؟! ء

حيلة "فر الطاوله" على المدافعين عن الشعب والدوله انهم هم الطائفيين مرفـــوضه! ء

قواك الله لديرتك مثل ما الله قواهم لديرتهم. بس المشكله انها مو نفس الديره!

كويــتي لايــعه كبــده يقول...

butash5e9...

ليش ما تفتح مدونتك بالكامل بدال فقط التعليق؟ حماسك مو ناقص ووقتك already ضايع بين المدونات :)

بوتشخيص يقول...

كويتي

البركة فيكم :) ودي بس أخاف ما أستمر .. و انتوا مو مقصرين ماشالله عليكم ..

بيني و بينك .. المدونات أصبحت تستخدم أساليب غير نظيفة في شحن الناس على توافه الأمور و وقت الفزعة .. تلقاهم بآخر الركب ..

أحمد الله إن هالأزمة أنتجت مدونات مثلك و شرواك ما تتبع حزب أو تكتل .. تتبع حزب الكويت :)

موفق

كويــتي لايــعه كبــده يقول...

butash5e9...

اتمنى التوفيق لجميع من عمل لاجل الكويت ولا غيرها.

لك التحيه