18‏/06‏/2008

شفافية بأكثر من معنى


السلام عليكم ورحمة الله وبركاته

السلام على من بقى صاحي بالديره. وما حاشه الخراب. السلام على اللي اللي بقو يتكلمون عن شيء اسمه اصلاح بهالديره اللي قاعد يتكسر مركبها على صخر الفساد. السلام على من اشوف فيهم طرف لمعة الأمل قبل لا تطفي. على من أقوي روحي المعنوية فيهم وهم ربعي واهل ديرتي وجيراني.ء

اما الباقين فالسلام لله

نطرت فتره قبل لا اكتب شيء قلت خل ادور شيء يفتح النفس اكتب فيه... ما لقيت شيء! مجرد انقطعت عن الكتابة.ء

دشيت المدونات (آخر اماكن الحرية بالكويت) لقيت حرب الوثائق، وهايف، ووفاة -لأ قتل- طفلة بريئة "بدون"، ومئة مليون دينار بمخابي فلان، والطامه الكبرى انقسام بينا وبين بعض "المجلس يبيله حل غير دستوري... لأ ما يصير لازم نثبت عليه ونصلحه"!!!ء

دشيت أقرأ الاخبار لقيت... "فلكيا الكويت يُحذّران:الغبار حتى نهاية العام". ما كملت... طلعت.ء

بهالحالة الزفت قلت ابي أكتب بموضوع خفيف شوي ما هو سياسي لكن له فائده ان شاء الله.ء

ألآيبود والشفافية

قبل فتره شفت الزميل معارض حاط آيبود بمدونته وعجبتني الفكره قلت خل اجربها. هي ترحيب بالقراء وهي تسلية لي كل ما دشيت المدونة. بس قلت تدرون شلون خل اسوي استفتاء على رأي الزوار الكرام واشوف رايهم... يمكن ما يحبون انجليزي (سايت الآيبود ما فيه الا الانجليزي) يمكن ما يعجبهم ذوقي يمكن يشبكومن من الدوام ومو ناقصين فضايح. يمكن حتى اعصابهم موليه وما يبون تفلسف واغاني تنرفزهم. وسويت استبياني.ء

هذه نتايجه تحت وبناءا على رغبات وخواطر الزوار خليت الآيبود ما يشتغل تلقائيا واللي يبيه مثلي فهو موجود حياه الله يشغله بنفسه. بس بغيت أشكر كل من عطاني رايه وبالذات من عطانياه بصراحة قاسيه (الاخ اللي قال ذوقك ما يعجبني) وانا اتوقع انه من الاعزاء علي لأنه تفضل على بالصراحه وساعدني اني آخذ القرار الصحيح. هذه خدمة بالنسبة لي. مشكور مرة ثانيه حتى ولو ان طلب الصراحه والتحلي بها كلش مو صفات كويتيه لكننا نرتقي ان شاء الله.ء

يا ريت لو تلاحظ الحكومه والا السلطه والا الاسره والتسميات كثيره لكن الزبده وحده هذا المثال البسيط ان "صديقك من..." اي ادري انكم تعرفون المثال بس لو تطبقونه. كل يوم والثاني طالعين لنا بالرقابه على المدونات والضروره لادراجها تحت قانون الاعلام ووو. لعن ابو داركم ما عندكم شغل اهم؟ الديرة ولت وهذول... ماني قايل.

حاولت ابعد عن السياسة بس شوفة عينكم

بالختام اكرر سلامي لحبايبي اهل ديرتي المحترمين المفكرين الغيورين الصالحين الاصيلين. ترى ما بقى بالديره الا شوية ناس صالحين (مهتمين ومتحركين) وانتو اكثرهم.

والباقين... السلام لله


هناك 14 تعليقًا:

secret يقول...

و عليكم السلام اخونا

و استفتائك يدل على احترامك لزوارك :)

و اخيرا
و عليكم السلام مرة ثانية

9ahba'a يقول...

يعطيك العافية ما نقدر ما نتكلم عن هموم الوطن دام انحبه و نموت عليه و يهمنا اصلاح وضعه
و الله يلوم اللي يلومك اللي يشوف الوضع ما يقول غير الله يستر مو من باجر من اليوم

دمت بخير

Mok يقول...

الاعضاء مجلس الامة انتوا اللي اخترتهم وتحملوا

شقران يقول...

العزيز كويتي لايعه كبده

:)


تدري ليش أنا مبتسم..لأن السياسة تمشي بدمك
:)

بديت بموضوع عن الاستفتاء(رغم إنه طافني وماشركت فيه) لكنك انهيت الموضوع سياسيا

يبدو ياعزيزي أن هذا قدرك وقدرنا
:)



ومثل ماقلت البعض نعاملهم بطريقة

السلام لله


يعني من باب الدين والأخوة



وأحلى سلام لحضرة جنابك..وخلك ويانا لأن الوضع محبط وشخصيا ما ودي أخسر احد...لأن الخساير حاليا مكلفة

يعني عالي المخاطر..تقدر تقول أخوك شاري أسهم بالآجل
وأي خسارة راح تكون مضاعفة
:)



وتحياتي لك

كويــتي لايــعه كبــده يقول...

secret...

احترام الآخرين من احترام النفس

وزوارنا هذول مو اي ناس
:)

زين يعني داري بنفسك انك من اللي سلمت عليهم مرتين مو الثانين
:)

كويــتي لايــعه كبــده يقول...

9ahba'a...

الله يعافيك

صدقتي... الله يستر

وانتي بصحه وعافي

كويــتي لايــعه كبــده يقول...

Mok...

انا اللي مختار اعضاء المجلس كلهم يا ظالم!؟
:)

نعم اختيار الشعب

وعارف قصدك لكن الفساد ما بدأ من المجلس والاصلاح ان شاء الله بدايته الفعلية ايضا ليس من داخل المجلس. مطلوب نية وافعال اصلاحية من السلطه

واللي وصل له المجلس اليوم هو نفسه اللي وصل له الشعب وهي ثقالفة الفساد. من اللي كرسها؟ وكيف؟ هنا بداية الاصلاح

مو حل المجلس وتعليق التمثيل الشعبي والدخول الى الظلام بارجلنا

ومن ناحية "تحملوا"... حنا عندنا خيار ثاني!؟

كويــتي لايــعه كبــده يقول...

...شـقـــــران

هلا بو راكان

:)

تدري ليش انا مبتسم؟

لأنك ضحكتني!

شنسوي بعد

وان شاء الله وياكم. وين بروح؟ قاعد لهم. الله يبعدك عن الخساير ويعطيك على قد نيتك الطيبه.

هي السالفة مو احباط... قناعات بعدم امكانية الاصلاح. ماسك نفسي عن الكتابة بهالقناعات (حاليا). الواحد لما يشوف بعينه وبالبرهان ديرته ومستقبل عياله رايحين وبفعل فاعل بعد اقل ما فيها انه يحوشه احباط!

حسبي الله عليهم ونعم الوكيل



الـمـحــــــب /


كويــتي لايـــعه كبـــده

:)

As YoU LiKE يقول...

انا ماصوت
بس حط اغاني عربية
نبي عبود مادري عبادي خواجة

Eng_Q8 يقول...

وعليكم السلام والرحمه


للامانه العلميه انا حطيت ينرفز :p

enter-q8 يقول...

الزميل
يرحم و الدينك و و الديني ان شاء الله

نبي مصطلح رديف لكلمة الاصلاح و اصلاحيين

نبي شي جديد

لأن خلاص خوفك عيالنا باكر يكرهونها
و الا اذا اكبروا و اسمعوا ربعهم يسولفون
عن الاصلاح يتخيلون انها اسطورة

كويــتي لايــعه كبــده يقول...

as I like...

انت وين تصوت وانت عند القديس حسن نصرالله قدس الله خشمه

لو فيه عربي كان حطيت عبادي الجوهر
"قالوا ترا ما لك امل في قربها لو يوم... "
والا تبي بشار ستار اكاديمي
:)

كويــتي لايــعه كبــده يقول...

Eng_Q8...

واشكرك على رأيك
ومساعدتك لي لاتخاذ القرار الصحيح

وعلشان خاطرك خلينا الاغاني ما تنرفز

اذا تبي الصج... انا كل ما دشيت واشتغلت الاغاني بديت اتنرفز هذا وانا اللي مختار الاغاني
:)

بس لا تعلم احد
:)

كويــتي لايــعه كبــده يقول...

Enter-Q8...

هلا والله بو وليد

آمين جزاك الله خير

ما عندي شيء يحل مكان الاصلاح
عكس الخراب والفساد هو الاصلاح
يا ريت لو كان التجاهل او الانانية او الحزبية كان قدرنا عليه

ليش باكر؟
الحين الاصلاح اسطوره وخيال بس حنا اللي معاندين!

الهتاف بالوطنية والعمل وفق "من صادها عشا عياله" اسهل واثمر من الوطنية الفعليه على حساب مصلحتك الشخصية الحاليه.

ولكن الاصلاح يبدأ من فوق...