سوالــف دواويــن

تحديث سوالف الديوانية بالأسفل

----------------------

بما ان الناس يقولون ويك اند -استغفر الله استغفر الله- قصدي نهاية أسبوع 

والجو مريخي (بالشدة على الراء مو هذاك اللي المفروض شاعر)

والخيام طارت وافلسنا من مخططنا الويك اندي

بندورها وياكم سوالف

(يعني لو الجو أوكي كان ...  :)  )

عندي سؤال:

اذا المهندس الكويتي............... مهندسنا

وأبو الدستور...................... أبونا

والحلم الجميل بديرة مو ماكلة تبن.... حلمنا

وحسام بن ضرار................. فارسنا (بحكم الصورة ولو يغيرها توهقنا)

والاستاذ حمام..................... أستاذنا

وفريج سعود...................... فريجنا

كويــتي لايــعه كبــده................... شنو؟

لايعه كبدنا؟ والا ملوع كبدنا؟ والا شنو؟

(يالله اللي شايل بقلبة يفضي. فرصة أحسن من هيج ماميش (بحريني من أصل كاولي))

(ودعوة غير مباشرة (لولا هالنغزة) للترفيع)

أقول...

مدام السالفة أسامي خل نكمل كانها حلوة :)

لكن فيه اسامي ما ينتغشمر معاها :(

مثلا عندك...

شقران... الله يخلي راكان اللي قمنا نسميك فيه

حمد نفس الشيء... الله يخلي ديما. أكو "مع حمد قلم" بس حكها الدهر

آز يو لايك... هو آز "أي" لايك

عاجل... عاجلنا؟ شدعوه الباجي خبول والا شياطين

أبو لطيف... أسم على مسمى

بنت الشامية... ما يصير بنتنا هي أكبر مني (رحنا وطي) واذا قلنا شاميتنا قالوا يتلزق

العرزالة... عرزالتنا (عدلنا البدليه لا تدقق عاد انت)

بوجيج... عاد هذا وزير ما ينتحاجه! آسفين طال عمرك.

كراكاتوا... بركاننا مو شيء واصلا نص الناس مسماك من غير تحرف ما يقولونه عدل

انتر ذا دراقون مادري انتر كيو ايت... بو وليد على خالد والا المسمى ما ينلعب فيه

بو تشخيص... شخصلي

مبيوق وسابقا حسافتج يا كويت... مسمياته بروحها تكسر الخاطر خلوه بروحه

حمودي وبدران... اولريدي مسميات خفيفة وحلوة

معارضة... هذا اسمه يخرع

حناحينو... اسم دلع جاهز

ولد الديرة... شدعوة العقروقة

موظف حكومة... ما له داعي تغشمر الاسم فكاهي وخالص

بس... الاسم معبر

=====

أكمل بعد شوي... العشا وصل

=====

نكمل

صلاح... صحفي خلوه. عضو مجلس أمة قال "اعلام فاسد" كلوه أنا شسون فيني

نفس الشيء أحمد الحيدر ومشاري بعد

براك... سمي رئيس الدولة العظمى الوحيده. مو ملاحظ قبل كنت أتغشمر معاك والحين بطلت؟ طال عمرك

بو مريوم... هذا ان حطينا عليه ردها بأكبر منها وتوهقنا

بلوق عمتي... نفس اللي فوق

ومقهور... هم نفس الشيء لا وهذا يزف

موك... ابي اعرف شنو يعني الاسم أول بعدين يصير خير

فتيني... اسم على مسمى

كويتاوي... بغيت أولع بالديوانية علشان يجي يطفيها بس الربع مسكوني الحمد لله

بوراشد... عاد هذا مشكلة. لا يقعدلي قعدة وبوستاته بس عني.

اكسزومبي... الاسم يخرع بس خوش واحد

فهد العسكر... التراث ما ينتغشمر فيه

mosan mosan... the dude's so nice he's named twice

زيدون... الاسم يعني زعنونو وهو العكس

كويت الخير... الاسم غير قابل للنقد

راعي التنكر... أخاف احتاجه بالصيف

والموت يعشق فجأة مثلي... والموت مثلي لا يحب الانتظار... بالذمة هذه تحتاج تحريف؟ تحتاج بوست كامل (ما شاء الله لا اسمها يحت)

well serviceman... أول شيء على بالي حمام الزيت

التحديث

-----

الساعة 10:18

-----------

"عمرك شفت تراب يغبر؟

عندي جدام البيت تراب الأصفر ما غيره اليوم عليه غبار ببعض الأماكن.

التراب يغبر!؟"

الساعة 12:00

-----------

الدكتور قاعد يعالج واحد من الربع كتفه يعوره

وصاحبنا الثالث غاثهم بشاعر المليون والصوت على تقريبا الفل

الساعه 12:11

----------

العشاء وصل

فارشين الوطن

الساعة 12:25

----------

خلصنا عشاء

الساعة 12:51

----------

خلصنا حلو

ورجعنا ندون

الساعة 1:51

----------

خلصنا البوست

وطولنا بسبب الهذرة مع الشبيبه

19 سنه والسوالف ليلحينها ما خلصت

(لو ناصر المحمد رئيس الوزراء من وقتها كان يمديه شكل 31 حكومة)

ملاحظة (وتهديد على الخفيف): بالدواوين محد يزعل من الغشمرة لأن اللي يزعل تلبس فيه السالفة عدل وما يفتك :)

والغشمرة ما تحلو الا مع الحبايب

سرينا...