05‏/04‏/2009

منيه ومناك وردود



شوية أخبار منيه ومناك تساهم بتشكيل الصورة العامة للأمور...

جريدة أوان30 مليون دولار هبة أميرية لمتحفي بيروت وصيدا
>الا شخبار متحفنا؟ أحد سمع عنه؟ أخواننا اللبنانيين يستاهلون كل خير ويشهد لهم التاريخ بالوقفة معنا في الغزو العراقي (مو الصدامي) وقبل أي دولة أخرى لكن أهلي الكويتيين يستاهلون أكثر وأولى.

جريدة الرايالملا: ناصر المحمد أفضل الموجودين لرئاسة الوزراء ولا نثق في من لايؤمن بالدستور والديموقراطية
>أتفق معك يا الملا أنه "أفضل من الموجودين" و"لا ثقة في من لا يؤمن بالدستور والديمقراطية" لكن هذا مو مدح له بل ذم للموجودين بكونه سيء الإدارة وضعيف المواقف وخفيف اليد من أموال الدولة. المشكلة الأساسية اللي محد متطرق لها هي عدم الترتيب الداخلي للأسرة اللي حطنا بهالمكان من صراعات وانقسامات وتخبط.

جريدة الشاهدالشؤون تطبق نسب زيادة العمالة الوطنية بالقطاع الخاص في  9  مايو
>من صجكم انتو؟! بعد اللي صار بالناس اللي اشتغلوا بالقطاع الخاص واللي صار لهم أكثر منهم من أصحاب مشاريع صغيرة لكم عين تتكلمون عن العمالة الوطنية؟ الكلام بصوب وقانون استقراركم بصوب ثاني.

جريدة الشاهدالبراك لـ  » الشاهد «: لن نتحالف مع أحد وسأكشف أخطاء  » المركزي « بالمستندات
>ناطرينك يا بو حمود. واللي يرحم واديك نبي شغل مرتب وبالمستندات. القوانين موجودة على الكتب لكن المشكلة بعدم تطبيقها على البنوك وعامة الشركات الكبرى وذو الأسماء الرنانة.

جريدة النهارالشمالي: «الاستقرار» يعيد الروح إلى الاقتصاد
>يا ابو النسف قانونكم يعيد الروح الى الشركات الكبرى والشركات الكبرى
 ليست الاقتصاد مثل ما يروجون اصحابها والمتنفعين.

جريدة الجريدةعهد جديد بين المركزي... وأهل الديون
>والعهد القديم من يحاسب عليه!؟

جريدة الخياراستجوابان.. حتى الآن؟..
>نعم يالتأزيم نعم. ولا أقصد النواب السابقين أو المرشحين الحاليين.

جريدة الأنباءمجاميع شعبية تزور الخرافي لحثه على الترشح
>أكثر والا أقل من المجاميع اللي صار لها سنين تطالب بعدم وجوده على الساحة السياسية!؟ والمجاميع اللي تتكلمون عنهم شنو رايهم بالمجلس الوثني وأزمة الحكم والمناقصات الغير مستحقة وشراء الأصوات "بلحم" (لحم يا رخاص!) وآداءه الصفري ومساهمته بالغلاء ومطالبته بإعانة الشركات ووو
لما عضو سابق غير ملياردير صرح انه ما يبي ينزل الانتخابات الا ان أهالي المنطقة طالبوه كان ما تسمع آخرها من ضحك على حركته المكشوفة لكن كبر اللقمة يا عنتر بالنسبة للخرافي وهناك 
من يعتبرها مادة اخبارية ولها مصداقية ومن يطالبه بالترشيح يرز أسمة بكل فخر :)
شوية حيا يا بشر

جريدة الآن: أوباما يجيب على أسئلة الأمريكيين الاقتصادية (إلكترونياً)
>وحنا رئيس حكومتنا منو معلقين وما ندري. واستقرار الشركات (مو الاقتصاد) يمر بمراسيم الضرورة. نعم للإدارة الناجحة واساليبها المجربة والنافعة. أوباما يرد عليهم بالإيميل......... يا كبر الفرق!

جريدة الآنمحافظ البنك المركزي: الكويت وضعت خطة استباقية لمواجهة الازمة العالمية
>يا ابن الحلال خلك من العالمية انت بس خلك على المحلية ونكون لك شاكرين. ولا تضيع السالفة ان الازمة عالمية لأن الأزمة العالمية كشفت بلاوي محليه. الا شخبار الشركات الورقية ومنع القانون لازدواجية المصالح التجارية والمناصب السياسية العامة ومخالفات الشركات والبنوك ووو؟ انت شلونك؟ زين؟

على الطاري...
جريدة الآنبينهم نواب سابقين وشيوخ ورجال أعمال معروفين 
أمام الجنايات الأحد المقبل بتهمه تزوير اكتتاب بنك بوبيان
>في داعي للتعليق؟!


وين البيرييه بس...
دبل لو سمحت


هناك 55 تعليقًا:

غير معرف يقول...

يبيلك تخلط البيرييه مع شي... ولا إذا بتظل جذي بتصير مينون...

وسلملي على متحف صيدا... خلف الله على بيت الشهداء... حتى الوفود الأجنبية قاموا يودونهم الأفنيوز وينسون بيت الشهداء!

كويــتي لايــعه كبــده يقول...

د. أزرق...

مو من اللي يخلطون

الآفنيوز وجه البلد الحديث... هذا كلام نفس الاشخاص اللي عيبوا على دبى انها معمار بدون حضاره.

يعيييوا على الناااااس والعيب فيهم

كبرياء انثى يقول...

صرنا مثل عين عذاري
واذا قلنا عدلو الشوارع
قالو عجز بميزانية الحكومة


واذا الحين استجوابين الله يستر من الياي
صراحة لا تعليق على الباجي
الله يكون في العون

كويــتي لايــعه كبــده يقول...

كبرياء انثى...

العجز في عقلية الحكومة لا ميزانيتها

nanonano يقول...

الحين أنا قاعده أتصدد تصدد عن الجرايد لأني ما أعبر

و أنت تدري بأهمية مدونتك بالنسبه لي

أدخلها..الاّ حاط لي زبدة الزبدة مالت الجرايد؟؟؟

حرام عليك

أي بيرييه...غافيسغون و يالله من الحارج

Kuwait يقول...

كويتـي لايعـه جبـدك ..
انا لاعت جبدي ويااااااااك ترى :(
ما وقفنـا عند الثلاثين بس :\
يقولك صندق التنميـه بعد يتبرع لهم شهالشقى !
وهبة أخرى من الصندوق الكويتي بقيمة 4 ملايين دولار لإقامة متحف في صيدا :\
الثلاثين مو كافيتهم :)
يعني الصندوق الكويتي للتنميـه صاير بيت الزكاة بفهم ؟
الخرافي يتدلع ما عليـك منـه :)
عساه يرشح ويوزع على الفقاره فلوس ولحم وثلاجات ويغير اثاث بيوتهم مثل العام وتالي يسقط ان شاااااااااءالله
<-- ترى مو شريره :q

غير معرف يقول...

استجوابين حتى الآن نعم يالتأزيم اذا كان مو قصدك المرشحين والنواب السابقين منو تقصد وضح والا ما عندك الشجاعة . تتفق مع الملا ان ناصر المحمد افضل الموجودين ثم تتهمه بالضعف وسوء الادارة وتتمادى في اتهامتك وتصفه بخفة اليد . ما هذه الوقاحة يا اخي تتطاول على شخص رئيس الوزراء وتكيل التهم دون دليل . انت على بالك ان هذا راح يرفع من شانك ويخيل اللى يقرا لك يقول شوف هذا والله شجاع قاعد يهاجم الشيوخ ومو خايف . لا لا غلطان اللي بيقرالك راح يقول اش هالخبل اللي يتهم الشيخ ناصر المحمد الاحمد الصباح بخفة اليد على اموال الدولة ليش هو ناقص هذا بن صباح مو محتاج يمد ايده ، وايده طول عمرها نظيفة

مركبنا يقول...

الله يهداك بوستك هذا يسدح الواحد بالمستشفى جامع الغثى كله !!!

الله يهداك

غير معرف يقول...

30 مليون فلس ولا دينار؟ لول

انزين ميخالف عليهم بالعافية بس احناااا وين رحناااا

enter-q8 يقول...

القرع لما استوى قال للخيار يالشمالي

ChEMiCaL-ENG يقول...

أخي العزيز

السلام عليكم

يعني لو مسوين متحف عندنا أحد راح يروح؟!!

لهذا مسويناه باللبنان لأن ربعنا كل هناك
يعني يخدمونك حتى برا البلد شفت شلون


و بعدين اوباما بطالي ما عنده شغل لهذا يقلب بالإيميل، و صاحبنا شاد حيله يطور الإقتصاد

يعني حرام المقارنة
:)))

و باقي الأخبار الله يعين بس

Joonna يقول...

بس برييه ... يبيلك قهوه بيضـــا كل نص ساعه يالله تلحٍق :)

well_serviceman يقول...

هذا حال الديره من زمان ياخوك.. نعطي بره وانخلي المواطن "حايس"

وعلى سالفة اوباما.. من قبل لا يفوز واهو شغال حملات الكترونيه باليوتيوب وموقعه الرسمي.. وكل يوم أحد أو اثنين في بعض الاحيان.. يصدر خطاب للناس البسطاء عبر الانترنت يخاطبهم ويستمع لتعليقاتهم... عاد على ما توصل تكنولوجيا بوحسين لنا.. انكون احنه متحنطين :)

تحياتي

@alhaidar يقول...

خوش سلة ..

اخوانا اللبنانيين يستاهلون .. يأبروني ;p

وأوباما شكله مدون من ورانا .. :)

تحياتي ..

ساره النومس يقول...

مواضيعك تبط الخشم وايد والله :(

خلها على ربك :(

غير معرف يقول...

يبا تخلطه مع ماي لقاح...

مسرع ما يروح فكركم عالمنكرات إنتوا!

bo bader يقول...

الخرافي ما راح ينرل بالانتخابات بحالة وحدة :


إذا الماي يروب .....

Um il sa3af wil leef يقول...

إخلط البيريه مع سيناركو أحمر :)

KQ8 يقول...

بس نقطه

سالفه التبرع حق لبنان لبناء متحف تعتبر اموال سياسيه شوف الحكومه اللبنانيه شنو شارطه وخلت ربعنا يكتون عليها فلوس تحت مسمى بناء متحف

كويــتي لايــعه كبــده يقول...

حناحينو...

اوووبس
سوري يا الغالية

مسحيها بوجه الادارة السياسية

كويــتي لايــعه كبــده يقول...

كويت...

فلوس الكويت من زمان مثل الحصالة اللي تنفتح من غير مفتاح

اذا ما عطوا برا عطوا نفسهم

والا حنا ما ندري يعني؟!

وإن شاء الله من قلب على آخر جزء سقوط الخرافي لكن أشك دام ان الناس صايره خراف لفلوس الخراف

كويــتي لايــعه كبــده يقول...

غير معرف...

ها خوتي ها

الله يخلي الريييس
الله يطول عمراااه
الله يخلي الريييس
الله يطول عمراااه

علامك نسيتها؟

"وضح والا ما عندك الشجاعة"
قايلها من قبل واردها لك "الأسرة الحاكمة". ارتحت؟ وصلت؟

خفة يد ناصر المحمد موثقه من قبل ديوان المحاسبة مدام انك تعرف تقرأ بالمدونات وينك ما قريت تقريرهم عن مصروفاته. أذا انت مو واعي مو معناته ما فيه أدلة.

"ليش هو ناقص"
اسأله هو
غيره أقل منه فلوس ما مد ايده على شيء. أدري انك ما تعرفهم لكن موجودين.

"هذا بن صباح مو محتاج يمد ايده"
ومن وين هالاموال الهائلة؟ تهقى عنده بقالة بفحيحيل...

الخبال والوقاحة انك تتكلم بعقلية "الشيوخ أبخص" وتعتبرهم معصومين عن الخطأ وبدون أدنى مستحى قدام الناس. مثلك ما يدري انهم بشر (لا قدر الله) وفيهم الزين وفيهم الشين وحتى زينهم يخطي. وبكل الحالات أهل الكويت أحرار (واضح ان مو كلهم) ويتكلمون باللي يمس مصلحتهم.

وجودك قمة الاحباط ان ندافع عن حقوق ومكتسبات شعب وديمقراطيته بعدين نكتشف ناس مثلك بينهم.

لله الحمد وان كانت هذه الفئة عالية الصوت بحكم الطبع الا انها الأقلية المتبقية.

كويــتي لايــعه كبــده يقول...

مركبنا...

واقعنا غثى
شسوي؟

كويــتي لايــعه كبــده يقول...

بوشا...

لا مو فلس

حنا وين؟
بآخر الإهتمامات

وبعدين يقولون مجلس الأمة سبب تأخر البلد

طيب عطو برا مرة وترك. الترك تكون لنا بالداخل. كان كم مرة بنينا مستشفى والا متحف والا مطار والا أي شيء يسحن البلد!!!!!!!!!!!!!!!!!!!!!

كويــتي لايــعه كبــده يقول...

بو وليد...

:)

الشمالي الوزير؟
والا من ربع المتابع ويعقوبي والفضي والذهبي وهذول؟

كويــتي لايــعه كبــده يقول...

كيميكال انجنير...

وعليكم السلام ورحمة الله وبركاته

ممممم
طيب خل يسوون مستشفى
والا تهقى ربعنا ما راح يروحون ويفضلون زحمة سكاريب المستشفيات الحالية

اوباما شفهمه؟

كويــتي لايــعه كبــده يقول...

جوونا...

البيرييه احدر فيه حبوب القهوة اللي قاعد آكلها تقول عيش

كويــتي لايــعه كبــده يقول...

ويلابون :)...

أدري عنه اوباما

وحنا مستقبل بلد بأكملة محد يدري باتجاهه

ما تنقصنا التكنولوجيا
تنقصنا النية والادارة

كويــتي لايــعه كبــده يقول...

أحمد...

لا والله مو خوش

مو اللبنانيين الأعزاء اللي بيأبرونا

حكومتنا اللي بتقبرنا!

كويــتي لايــعه كبــده يقول...

طموحة...

ونعم بالله
هي على الله
من غيره داري عن مصلحة البلد؟

"تبط الخشم"!؟
جديده علي
الظاهر خلصنا أشياء تنبط

بس يقول...

يا مساء الخير

عاد مالي جبد على الرقي :p


يقولك الخرافي استخار بس متوقف الفقير :)؟ مايدري منو الرئيس من جذي حالته صعبة عساه بهالحالة و اردى ؟


حتى مسلم جموع غفيرة تبيه ينزل و رشدي اباظة و اسماعيل ياسين بعد و كلهم قالوا راح يحطون مصلحة الكويت بين عيونهم بس هاااا ؟ عقب مصلحتهم الشخية ؟

و عطني بيرية بالليمون و صلحواا :)

كويــتي لايــعه كبــده يقول...

د.أزرق...

مو أنت حتى مدونتك للكبار فقط
ما ننلام
:)

كويــتي لايــعه كبــده يقول...

بو بدر...

على التلوث هالايام حتى الماي يروب
لكن الخرافي ما يتوب

شحقة يتوب وماشية معاه من "فوووووق" لي تحت زي العسل؟

كويــتي لايــعه كبــده يقول...

أم السعف...

بخلط البيرييه بـ"الكتشن ايد" مع زجاجه يمكن ينفع

بس بقط المغطه

كويــتي لايــعه كبــده يقول...

بو طارق...

شنو بعد "شارطه"؟
وليش تتشرط!؟

طيب خل يتبرعون ربعنا لنا بالداخل ويسمونها صدقة راضيين

كويــتي لايــعه كبــده يقول...

بس...

الخرافي طول عمره يحسب مصلحه بقسم المحاسبة

الخرافي استخار!؟ :)
اي مو ذابحه الحلال :)
لو ورا ابليس فايده كان ما تردد وصار عصعصه.

اخذي البيرييه مالي
بشرب ماي بطارية يمكن يسوي شيء

elhammaady يقول...

المبلغ الذى تتحدث عنه ليس هبة من سمو الامير حفظه الله ورعاه وانما مجرد مبلغ لدعم المشاريع التنموية فى لبنان من الصندوق الكويتى لدعم المشاريع التنموية بالدول العربية ولكنى اظنك لا تعرفه ولا تسمع عنه لانك من الواضح انك جاهل واخيرا ايش فيها ان يتم تقدم الدعم لدولة عربية حتى نساعدها الم تقدم الكويت الدعم لغزة والكثير من الدول الاخرى

elhammaady يقول...

يا حبيب قلبى انت تناقض نفسك الشيخ ناصر المحمد بالفعل افضل شخص يستحق هذا المنصب ولكن انت تحاول ان تعكس الكلام وتفسره على هواك وما يحدث داخل الاسرة امر لا يهمنا لان ما يهمنا هو النتيجة ولقد كانت النتيجة اكبر ضربة لك ولامثالك عندما اعلن سمو الامير حفظه الله ورعاه انه حل مجلس الامة وسوف يتم الدعوة للانتخابات قريبا هذا اكبر رد على تمسك سموه بالدستور وانه يرفض اى محاولة لتعطيل الدستور

وليد الديرة يقول...

الى DR BLUE
الى كويتى لايعه كبده
الافضل ان يذهبوا الى بيت الشهداء قبل كل هذا لان بيت الشهداء رمز للوطن وليس الافينيوز الذى يوجد افضل منه فى الدول الاوربية ولكن بعض المتخلفين يعتقد ان الافنيوز واجهةللكويت ولو كان هذا صحيح لكان الذهاب لفرنساافضل بكثير من الذهاب للكويت

ZwaiZ يقول...

khabar jareedat el-anba`a naaar

كويــتي لايــعه كبــده يقول...

الحمادي بالكسره...

User Stats
On Blogger Since February 2009
Profile Views 11

انت من فطريات التدوين المبعوثين للتغلغل في هذا العالم من وقت استجوابات "الريس" للدفاع عنه وعن أي شيء يمس معازيبكم اللي دازينكم. مكشوفين لكن العتب على اللي يستحي منكم. والحلو بالموضوع ان أغلبكم غير كويتي. ربعك سووا بلوك على اكاونتاتهم وانت لي الحين ليش؟

بعدين مو واضح اذا الاستعباط تمثيل وجزء من الوظيفه والا منحه الاهيه تنعم بها. في أحد تطرق لمصدر الأموال بالتحديد؟ ركز يا زلمه.

انت يا ما تعرف تقرا يا ما تفهم.
وشكلك تقرا بدون مشكلة.

كويــتي لايــعه كبــده يقول...

الحمادي بالكسره...

User Stats
On Blogger Since February 2009
Profile Views 12

لي صار رايك مهم ادق لك بيجر.

واذا تبي تنسى كل شيء مو مشكلة لكن شيء واحد لا تنساه...
.
.
.
مركز؟...
.
.
.

أنا مو حبيب قلبك.


اسلوب درعا خله

كويــتي لايــعه كبــده يقول...

ولد الديرة...

هذا بالضبط رأيي

فهم اللوح اللي قبلك انتي شو كلت

كويــتي لايــعه كبــده يقول...

زويز...

المجاميع من طقة الحمادي (بالكسرة لو سمحت) وانت نازل

الله يخلي الريس
الله يطول عمره

المقوع الشرقي يقول...

اللللللللله ىا آنا بخاطري
منت خابر قبل الاسميت اللى حجر أساس
ويتلون الستاره!!
ولا مقص عن عين العدو..قصت شريط
يالله على بابك ما خاب طلابك
:)

فريج سعود يقول...

هالمانشيتات يبيلها بيرة مو بيرية ويمكن تهضم بعد

غير معرف يقول...

كويتي لايعه كبده...
إسمحلي بس في زلمة هون رافعلي ضغطي...

الحمادي...
وإنت من داس على طرف أهلك؟
قال دعم مشاريع تنموية في لبنان قال! لا تحاتي... باجر تدك لكم ياها إسرائيل كالعاده لما يتحرش السيد فيها... وعقبها تعالوا تبجبجوا عندنا! سنين والكويت "تساعد"... وبالأخير هي وحدة من الشايتين... يا مسمين شارع بإسم "الكويت" ولا حارقين علمنا كل ما ياكم إتصال من المرشد العود! وايد عليكم

عيل الشيخ ناصر المحمد أفضل رجل للمنصب ها؟

إنت تحجى كويتي نفس البشر الأول... بعدين تعال جابلنا. شهالأمة اللي إبتلشنا فيها؟؟



كويتي لايعه كبده...

شوف انا شلون كنت محترم معاك وقلت "تخلط" بس؟ ما عجبك وزفيتني

ياك فريج سعود الحين وقطها بويهك... مشكلة الدبل ستاندرز!

حرف يقول...

آه يا قلبي

30 مليون عاد ؟

بيسوون الظاهر متحف ينافس اللوفر

طل بعينهم

كويــتي لايــعه كبــده يقول...

المقوع...

؟!

كويــتي لايــعه كبــده يقول...

فريج سعود...

غير كحولية طبعا
(ترا اللي تحتك يتصيد)
:)

كويــتي لايــعه كبــده يقول...

د. أزرق...

مسموح
ما يبيله

ما عاش من زفك
انا بس وضحت

دبل ستاندردز!؟ انا اتجرت :)
الرجل قصده غير كحولية
لا تسيء الظن

كويــتي لايــعه كبــده يقول...

حرف...

وبعيننا

صراحتك مشكلة

elhammaady يقول...

الى كويتى لايعه كبده

مشكلتك انك تتهم الاخرين ولا ترد على الكلام بالحجةوالدليل المقنع وهذه طريقة امثالك ممن لا يفهم ولا يريد ان يفهم لانه لا يستطيع ان يفهم وسوف يعيش طول عمره(.....) حاول ان تفهم .
تقديم الدعم للدول العربية هذا هوالموضوع الذى يجب ان ترد عليه بدلا من ان تهاجمنى واجهنى بالدليل والبرهان

enter-q8 يقول...

الى الفقع
عمرك سمعت عن المقوله اللي تقول
اللي يحتاجه البيت يحرم عن الجامع

اقرى هالخبر
الهيئة الخيرية الاسلامية العالمية
تتبرع بـ30 الف دينار
لأدارة المسنين
ادارة المسنين بالكويت
اللي ترعاها الدولة منو اولى بالهبة يا طنبور الطين
و بعدين جاي تتكلم عن مصروفات ناصر المحمد الرجل اعترف ان عنده خلل و اخطاء شتبي بعد
كويتي لايعه كبده ترى قاعد تاذن بمالطا

المقوع الشرقي يقول...

مستشفى
مستوصف
مركز صحى
جامعه
معهد
مدرسة
مركز ثقافى
مدينه اسكانيه
مسرح

حتى لو متحف

مشروع تنموي واحد نبى يحطوله اسميت حجر الاساس ويفتتحونه بالمده المطلوبه
ويتلون الستاره عن مسمى المشروع
ويودون المقص لافتتاح المشروع
نسينا يعنى شنو مشاريع!!!
تحياتى