27‏/05‏/2008

رغبة الشعب والدينار السياسي


الاجواء السياسية كعادتها مشحونة بمحنة او اخرى. وحديث الساعه منقسم على تشكيلة الحكومة وانتخابات رئاسة مجلس الامة.ء

في عالم التدوين لا يوجد من يشتري الاصوات ولا من يوزع اللحم. في عالم التدوين لا نعرف بعضنا او قرائنا كي نمرر لهم المعاملات او العلاج بالخارج. ولا نستفيد من بعض لا التوظيف ولا التنفيع. ولا نملك القدره ان نضمن لعصام الدبوس رفض رفع الحصانة ولا نقدر على "اقناع" الوزير السابق المعتوق للتنازل عن قضيته المرفوعه ضد محمد هايف لجمع الاصوات.ء

حاولنا بمدوتنا المتواضعة جدا جس نبض الرأي العام ومعرفة رغبته لمن يرأس مجلس الامة وهنا النتائج...ء
.
السعدون ... 53 .% ... اي اكثر من نصف اجمالي الاصوات
الخرافي ... 5 ..% .... لا تعليق
الرومي ... 24. % .... اقل من الربع بقليل

السلطان ... 4 ..% .... نسبة متدنية واضحة
البراك .... 10. % .... نسبة لا بأس بها علما بعدم جديته للترشيح
شخص آخر 1 ..%..... وهي نسبة قليلة ترغب التغير الى خارج من هم مطروحين

الملاحظه هنا هي ان الرومي والبراك والصقر ايضا كلهم لوحوا او بالفعل وطرحوا اسمائهم للترشيح لمنصب الرئيس كوسيلة للضغط على السعدون لطرح اسمه بعد ما اتضح انه ينوي عدم الترشيح وبالفعل تسبب ذلك في ترشيح السعدون. من يشك بهذه المعلومه فقط عليه ان يلاحظ تواريخ الترشيحات وايضا يسأل بالدوائر السياسية.ء

حسب الاستبيان البسيط هنا برغبة الشعب وبالتالي ممثليه وبالاضافة لها المعلومة المذكوره ان اغلب المنافسين هم بالفعل حلفاء تتضح الصوره بالفوز السهل للسعدون... ولكن...ء

لما ندخل الدينار السياسي بالحسبة تتأثر الامور بعض الشيء. وهناك الحكومه المغلوبه على حالها. من ناحيه هناك خلاف معلن بين رئيس الحكومه والخرافي ومن المتوقع عدم تصويت الحكومة له او التصويت لخصمه حتى. ولكن هناك سوابق كثيره ان الحكومة يدار بعضها من خارج مجلس الوزراء من قبل الفساد. السؤال هو هل اختيارات الحكومه هذه المره سليمه ومتجانيه ام "تلش"؟

رئاسة البرلمان الكويتي وبهذا الوقت بالذات وبهذه التشكيلة داخل المجلس مصيرية. يا ان المجلس يفقد المتبقي من ثقة الشعب ام يعمل على زيادتها. معركة الرئاسة ليست الاصلاح بذاته لكن تكملة المسيره الشاقة نحوه.ء

ز
للمزيد من القراءات الحديثة...ء
.
.

هناك 31 تعليقًا:

عمار يا كويت الماضي يقول...

ال 53% نسبة تجلب التفائل، لكن انا متأكد ان من يقرأ المدونات و اللذين صوتوا لهذه النسبه هي الطبقه القليلة الشريفة المتبقية من الشعب و اللي محترقه قلوبهم و متحسرين على ضياع هالديرة اللي والله ماتستاهل اللي قاعد يصير لها و فيها، لكن شنقول الله كريم و تفائلوا بالخير انشاءالله

Bo Jaij يقول...

أصوات الحكومة لن تكون كافية لترجيح كفة السعدون هذه المرة

أغلب النواب القبليين...كل حدس...كل الشيعة...كل السلف ما عدا السلطان سيصوتون للخرافى

Eng_Q8 يقول...

جم يوم وراح انعرف منو راح يفوز

شـقـــــران يقول...

العزيز كويتي


شخصيا شاركت بالتصويت وللسعدون طبعا

وأعتقد إن هالمؤشر يعطي نوع من التفاؤل ولكن داخل قاعة عبدالله السالم يتلخبط كل شيء!!!؟؟



مع وافر الاحترام والمودة



المحــــــــــب/


شـــقــــــران

shahad يقول...

إذا عاد السعدون للرئاسة على الدنيا السلام ، لكن إنشاءالله يخيب كلامي

عموما أعتقد الحكومة ستصب أصواتها للخرافي و النتيجة شبه مضمونة

الرومي! لا تعليق لكن إذا كان نزوله للضغط على السعدون كما يشاع إذا المعلومة تحمل منطق لترشيحه

السلطان ! خيبة و خيبة أكبر إذا كان نائب الرئيس مرة أخرى إسلامي سلفي أو إخونجي

عموما الوضع متردي بكل الأحوال أأمل خير لكني على يقين غني لن أراه إلا بعد آخر قطرة نفط

عدس يقول...

الكل يبيها السعدون..
و السعدون صاحب هيبه ووطنيه و خبره!!
الله يوفقك يا العم بو عبدالعزيز

Enter-Q8 يقول...

على هالتشكيل
على مأظن لاعت جبت الكويت كلها

غير معرف يقول...

الاستبيان يدل على شعبية جريدة القبس

ومسايره الموضه اللى هابه بالديره

انا اعرف كل شي انتم شعرفكم

كويــتي لايــعه كبــده يقول...

عمار يا كويت الماضي...

ىايي من رايك ياخوي
وبالفعل الاغلبيه الموجوده بعالم التدوين فعلا مهتمين بحال البلد والتصويت هنا يعكس رايهم
وهذا ما اردت ان اوضحه

وثم هناك المال السياسي والرشاوي والمصالح والحسابات الحزبيه والقبليه والطائفيه ووو

لكن الامل موجود ان شاء الله
والمعركه قائمه

كويــتي لايــعه كبــده يقول...

Bo Jaij...

تتكلم بشكل قاطع يا يبه والحسابات ليلحين ما استقرت

القبليين مو كلهم بايعين للخرافي
حدس اليوم ما هي حدس وثقل المجلس اللي فات ويقايضون على شنو؟
هناك من الشيعه من هو اعلن رغبته للسعدون (حسن جوهر)ء
والسلف كرت الجوكر لكن "مبادئهم" ما تنسجم مع الخرافي

فمثل ما انت شايف الموضوع لم يحسم

ما سمعت عن التجمع بديوان الملا من قبل 25 نائب لنقاش لنقاش التصويت للرئاسه

الحديد حامي والكل يضرب

وهذا حنا فيها

اليأس ماكلنا كلنا بس هذى كبيره وما يصير نفقد بهالتوقيت

عزيز يا بوجيج

كويــتي لايــعه كبــده يقول...

Eng_Q8...

هي ماهي فضول بس نبي نعرف

نبيها السعدون

:)

كويــتي لايــعه كبــده يقول...

شـقـــــران...

داخل قبة المرحوم شيخ الشيوخ عبدالله السالم
الحسابات كلش غير
ومن ضمنها النقاط اللي ذكرتها بالمقال

الموضوع بالهوا طاير كيف يهبط الله اعلم

بس ان شاء الله خير

كويــتي لايــعه كبــده يقول...

shahad...

"إذا عاد السعدون للرئاسة على الدنيا السلام"

ليش يا اختي ليش؟

اذا عندك معلومه معينه تفضلي فيها
وفيديني الله يعافيك

والا بس مصدقه التسويق ضده انه تأزيمي وياكل من تحت لي تحت ووو
مثل ما تناقشنا بالبوست الماضي

"عموما الوضع متردي بكل الأحوال أأمل خير لكني على يقين غني لن أراه إلا بعد آخر قطرة نفط"

مع الاسف كلامك صحيح
وازيدك من الشعر بيت
الدنيا ما راح تنطر آخر نقطة نفط تخلص على شان يحولون الى اشياء بديله
بل التحويل تدريجي
وهناك مأشرات كثيره تبين الانتقال بتفكير العالم الصناعي الى "ما بعد النفط" والاسعار الحالية تزيدهم تفكير

يعني بيبقى عندك نفط بس بيعته ما تسوى اللي تسواه اليوم
ولا حتى جزء بسيط

الامور هذى اكبر من المجلس
هذى توجه بلد
ونحن بلد بلا رؤية

عسى بس نلحق ننقذ شيء

كويــتي لايــعه كبــده يقول...

عدس...

لا والله مو الكل مثل ما انت شايف

لكن الاغلبه ات شاء الله

الله يسمع منك ويصير التوفيق للكويت عن طريق السعدون

كويــتي لايــعه كبــده يقول...

Enter-Q8...

يعني انا ما انلام


(لو اقول لك القصص اللي عندي كان عرفت ليش اخترت هالاسم من قلب)

كويــتي لايــعه كبــده يقول...

Anonymous...

"الاستبيان يدل على شعبية جريدة القبس"
كنت تتمنى الوطن؟


"ومسايره الموضه اللى هابه بالديره"
ليش مسوين سبايكي؟
والا قاعدين بساربكس البحر لابسين ماركه معينه؟


"انا اعرف كل شي انتم شعرفكم"
اما هذى حلوه
اشكرك على المداخله
واهنيك على العقليه

بما انك تعرف كل شيء...
منو اللي بيفوز بالرئاسه؟
وشبيصير بالكويت لما يخلص النفط؟
(LOST) وشنو نهاية المسلسل لوست؟

شوية اسلوب ترى ما ضرت احد

هذيان يقول...

حقيقة لأول مرة أنتمى أحمد السعدون أن لا يكون رئيس المجلس لسبب غير سبب خلافي معه
أتمنى أن لا يكون رئيس المجلس وخصوصآ بعد التشكيل الحكومي لأن موقفه كنائب أفضل يعفيه من الحرج في نقاش القضايا
اللي مبينه أنها لها أول وما لها آخر
حقيقة حتى وان كنت أختلف مع السعدون ولكن أرى السعدون المعارض في هذا الوضع أفضل من رئيس مجلس الأمة
والله في هذة الظروف والتشكيل الوزاري أن رأينا السعدون يحمل لواء تصحيح مهاترات الحكومة
فنتجازو الماضي وتجدنا كلنا خلفه

حسام بن ضرار يقول...

عسى يفوز اللي فيه الخير للكويت و لشعبها

و ما اظنه .... اللي في بالي

As YoU LiKE يقول...

اذا فاز السعدون
راح اعزمك على هارديز

موافق ؟

صعبة ياحج .. لازم يرضون عليه .. مااتوقع مااتوقع ..

مع اني حاس بكسرة محترمة من المحمد .. بعد مااخذ الضوء الاخضر انه يكسسر بالخرافي :)

حسافتج يا كويت يقول...

أنا ابي اي واحد يكون همة الاول والاخير على الكويت فقط فققققققققققققط

غير معرف يقول...

والله الشعب اللي تنتمي له اقل بكثير من الشعب اللي شكل لنا هالمجلس التافه ...السعدون مثل ما قلت قبل يبيله رئيس وزراء مسؤول و عنده منطق في الادارة واختيار الوزراء ويعرف شلون يتعاون مع المجلس و يكسب النواب من خلال الاجواء الغير رسمية ...رئيس وزرائنا الحالي مع الاسف فاقد لكل هذه الصفات ...مع الاسف الظاهر القيادة السياسية في البلد تبي تصكر المجلس باختلاق المشاكل معه و الظاهر انهم شايفين انهم ما يعرفون يمشون الامور بالبلد من غير تلاعب وبوق وتنفيع و توزيع المصالح اللي اذا احصلت بظل تواجد مجلس امة ما راح تمر مرور الكرام فالقيادة السياسية الظاهر انها شافت ان الدكتاتورية بالسعودية والامارات اهي الحل في مسك زمام الامور في البلد واتخاذ القرارات من غير مناقشة او مساءلة ...وضحت الامور يا ايها الاخوة والاخوات ..ولا انسى ان اذكركم اننا باتجاه التنازل لدول الخليج عن ثرواتنا باسم توحيد العملة و الوحدة الاقتصادية والسياسية من بعد ذلك وكل هذه الامور ستتم على قفانا حيث ان جميع دول الخليج ماخذة قروض من البنك الدولي الا احنا ...احنا اللي بنسددلهم غصبا على اللي ما يرضى ..والجهة الوحيدة اللي بتعترض طبعا مجلس الامة ..علشان جذيه سيتم هدم هذه المؤسسة الديمقراطية الدخيلة من وجهة نظر القيادة السياسية على دول مجلس التعاون ..ليتم ازالة اي عقبة تعترض مشروع توحيد دول الخليج وان كانت هذه الوحدة من غير موافقة الشعوب ..شعوب الخليج ليس لها راي الا شعب الكويت الحر وراي هذا الشعب سيصادر قريبا لانه من وجهة نظر القيادة السياسية عقبة في سبيل الوحدة مع الخليج ..قد يقول قائل بيه شهالتشاؤم شها الفلسفة شهالخبال ..لكن والله العظيم هذا اللي بيصير وتذكروني زين و بتقولون والله قالها باسجيل ..ورب الكعبة بيصير لانه الدول الغربية اللي تحمينا وتحمي مصالحها بالخليج ملوا من هالحماية ويبون يلقون وسيلة علشان دول الخليج يحمي مصالحها بنفسها دام المصالح وحدة و الجيب صار واحد مع الولايات المتحدة الامريكية ...انا ادري هالكلام ممكن تكون عقولكم ما تحملها (ودي اصدق بس قوية قوية) لكن انا ما اقول الا تذكروني اذا صارت ولا حد ينكر اني قلت ..الله يعينكم على اللي بيجيكم

باسجيل يقول...

Anonymous said...
والله الشعب اللي تنتمي له اقل بكثير من الشعب اللي شكل لنا هالمجلس التافه ...السعدون مثل ما قلت قبل يبيله رئيس وزراء مسؤول و عنده منطق في الادارة واختيار الوزراء ويعرف شلون يتعاون مع المجلس و يكسب النواب من خلال الاجواء الغير رسمية ...رئيس وزرائنا الحالي مع الاسف فاقد لكل هذه الصفات ...مع الاسف الظاهر القيادة السياسية في البلد تبي تصكر المجلس باختلاق المشاكل معه و الظاهر انهم شايفين انهم ما يعرفون يمشون الامور بالبلد من غير تلاعب وبوق وتنفيع و توزيع المصالح اللي اذا احصلت بظل تواجد مجلس امة ما راح تمر مرور الكرام فالقيادة السياسية الظاهر انها شافت ان الدكتاتورية بالسعودية والامارات اهي الحل في مسك زمام الامور في البلد واتخاذ القرارات من غير مناقشة او مساءلة ...وضحت الامور يا ايها الاخوة والاخوات ..ولا انسى ان اذكركم اننا باتجاه التنازل لدول الخليج عن ثرواتنا باسم توحيد العملة و الوحدة الاقتصادية والسياسية من بعد ذلك وكل هذه الامور ستتم على قفانا حيث ان جميع دول الخليج ماخذة قروض من البنك الدولي الا احنا ...احنا اللي بنسددلهم غصبا على اللي ما يرضى ..والجهة الوحيدة اللي بتعترض طبعا مجلس الامة ..علشان جذيه سيتم هدم هذه المؤسسة الديمقراطية الدخيلة من وجهة نظر القيادة السياسية على دول مجلس التعاون ..ليتم ازالة اي عقبة تعترض مشروع توحيد دول الخليج وان كانت هذه الوحدة من غير موافقة الشعوب ..شعوب الخليج ليس لها راي الا شعب الكويت الحر وراي هذا الشعب سيصادر قريبا لانه من وجهة نظر القيادة السياسية عقبة في سبيل الوحدة مع الخليج ..قد يقول قائل بيه شهالتشاؤم شها الفلسفة شهالخبال ..لكن والله العظيم هذا اللي بيصير وتذكروني زين و بتقولون والله قالها باسجيل ..ورب الكعبة بيصير لانه الدول الغربية اللي تحمينا وتحمي مصالحها بالخليج ملوا من هالحماية ويبون يلقون وسيلة علشان دول الخليج يحمي مصالحها بنفسها دام المصالح وحدة و الجيب صار واحد مع الولايات المتحدة الامريكية ...انا ادري هالكلام ممكن تكون عقولكم ما تحملها (ودي اصدق بس قوية قوية) لكن انا ما اقول الا تذكروني اذا صارت ولا حد ينكر اني قلت ..الله يعينكم على اللي بيجيكم

كويــتي لايــعه كبــده يقول...

هذيان...

تكتيكات "كامب الخرافي" كثيره

واذا السعدون نحتاجه كمعارض نحتاجه كرئيس حازم اكثر بكثير

عسى بس مو الخرافي اللي البلد تحتاجه ريس بهذه المرحله!؟

السعدون اتت عليه ضغوطات غير شريفه من ناحيه واتهامات شعب غير مثقف من ناحية اخرى

ها هو الآن انسحب دون انانيه لتعظيم فرصة فوز الشخص البديل المناسب (الرومي) لرئاسة المجلس وتقليل فرصة الفساد وهنا اقصد الخرافي

السعدون رجل كبير وشخصية تاريخية وطنية من الطراز الذي محاه الزمن.

هناك الكثير من ابناء الشعب من ظلم هذا الرجل

ليش اصرار السعدون الدفاع المستميت عن الدولة والشعب الذان يذموه؟... بصراحه لا اعلم

كويــتي لايــعه كبــده يقول...

حسام بن ضرار...

ان شاء الله الفوز للكويت

ورئاسة المجلس للرومي

كويــتي لايــعه كبــده يقول...

As I LiKE...

بالرغم اني مقاطع شركات الخرافي فوق السنتين

مستعد آكل من مطعمه بمناسبة فوز السعدون

ولانك انت العازم
:)

بس الرجل انسحب علشان يسحب البساط من تحت منتقديه ويربك "كامب الخرافي" رجوله وحنكه سياسيه نادره بالذات بهذه الايام

اما المحمد فهو ابو الكسرات... شيء بكيفه شيء مو كيفه

اعزمك على فلافل وبطاط لما يسقط الخرافي
:)

كويــتي لايــعه كبــده يقول...

حسافتج يا كويت...

وهذا اللي حنا نبيه وانا اخوك

اذا مو السعدون الرومي

نبي الشرفاء
نبي اللي ينفع الكويت
مو اللي ينفع مخابيه!!1

كويــتي لايــعه كبــده يقول...

Anonymous...

اتفق معك

واتمنى الآخرين يشوفونها

كويــتي لايــعه كبــده يقول...

باسجيل...

ليش الاعاده؟

وانا لاحظت التعليق ب"الآن" بعد

اللي جاي مصايب بمقدار الناس ما تتخيله

غير معرف يقول...

دش موقع الدكتور عبدالله النفيسي واسمع الكلام اللي قاله بعد حل المجلس سنة 86...الصدفة اني سمعت هالحجي بعدما توقعت وكتبتلك الكلام اللي كتبته البارح عن نية القيادة السياسية بتسكير المجلس ..سبحان الله والله جنه قربنا حيل من تطبيق هالنظرية

كويــتي لايــعه كبــده يقول...

Anonymous...

شكرا
هذا انا الحين رايح

الكلام هذا فاهمينه ناس وايد واولهم كبار السياسيين والاقتصاديين ويغذيهم في ما يعملون من فساد و نهب واللعب بأقل حذر من قبل لانهم يقولون "هي رايحه رايحه"ء

(ممكن تعطيني اللنك بالضبط الله يعافيك)

غير معرف يقول...

http://www.alnefisi.com/Default.aspx?Pages=sound
بعد حل مجلس 86