27‏/11‏/2009

كل عام وحنا وبصوب والخير بصوب


(اللي ما له خلق يقرأ يروح لي آخر كم سطر)
خلوني أكتب بالكويتي هالمرة
لي ضاقت فيك الوسيعه ما لك الا لسانك الاصلي

من فترة وأنا مو قادر أكتب بسبب ماني قايل الإحباط فمو بس تعودنا عليه الا نتجاهلة علشان نستمر ولكن بسبب الخوف الشديد اللي بقلبي. وما هو خوف على نفسي والا على شيء معين كثر ما هو على الديرة اللي تتفكك قدامي. طبعا لي اللي أخاف عليه شخصيا فالكل وراه عياله وأهله قبل نفسه لكن السكوت اليوم يخرب ديرتهم مستقبلا. ما كان لساني اللي مربوط الا قلبي اللي مزحومة فيه الأفكار وكل منها سكر على الثاني وما طلع شيء بالرغم انه على طرف لساني...

ولله الحمد مهما وصلت فينا الأمور الا بالنهاية حنا بالكويت. "بالكويت". تدرون شنو الكويت؟ الديرة اللي أسرتها الحاكمة وأهلها متناسبين ومتشاركين بأمور كثيرة. الديرة اللي كبيرها وصغيرها يقعدون بديوانية وحدة وعلى طاري الديوانية هي أيضا اللي بدواوينها السني يحط على الشيعي ضغاط لي الفجر والحضري يحط على البدوي والعكس لي نص الليل والكل يضحك وحبايب. الكويت اللي ما "وخذت" لا بسيف ولا بمنسف. الكويت اللي صدام الله يلعن ذكراه بجيشة وتعذيبة ما قدر يطلع كويتي واحد يعترف بحكمة ويتعاون معاه. الكويت اللي حتى "معارضتها" قالوا ما فيه الا الصباح للكويت. هذه الكويت وهذا الكويتيين. طبعا محنا المدينة المثالية الخيالية لكن بحلوها وبمرها وغبارها وبجلاحها فهي ديرة أمي وأبوي. هي ديرتي. هي عزوتي. وأنا عزوتها ان شاء الله.

بصراحتي الكويتية أكتب اللي يمليه علي ضميري. بدون محاباة لأحد. لا تيار ولا شيخ ولا حتى مجموعتي الإجتماعية اللي البعض يصر أنه يقسمنا حسبها. لما أشوف الكويت تنتهك شلون ما أكتب؟ لي كان شيخ مثل علي الخليفة أقولها وياما قلناها. لي شفت فساد من أحمد الفهد أقولها. لي شفت حدس تدبك على جروح ديرتي أقولها. لي شفت سعدون حماد يطق تحية للفاسدين كالعادة أقولها مثل ما أقولها لما أشوف اهتمامات القلاف طائفية. بالنهاية الظاهر ان هذه هي المشكلة. شلون حنا يا مدونين ما لنا حسبة سياسية. شلون نقول الحق لو وين كان! يعني ما لنا أحد نحتمي فيه ونسنده دايم ويسندنا دايم؟ غير الله والحق اللي أمرنا فيه لأ ما لنا وهذه ميزة مو عيب. ولو أن البعض من اللي تعودوا على السياسية ونظام التقسيم واللعب الوسخ يقولونها أشكرة "ترا ما لك تيار ولا قبيلة تحميك ولا انت تاجر ولا شيء"! ردي عليهم :الله مو كافي؟ البعض يضحك كأن اللي قلته يضحك وهنيه طبعا تشوف القناعات والإيمان فيها. طبعا يشوفونا سذج بهالقناعات. اذا الإيمان بالصح والغلط والإصرار على العيشة بهالاسلوب وتربية عيالنا على القيم سذاجة... نعم حنا سذج عسى الله ما يحرم الديرة من السذاجة وما يصير الكل متمصلح ولا "من صادها عشا عياله" القناعة السائدة.

بالكويت مشينا من السيء الى الأسوء. من الخدمات السيئة الى الفساد التام في أغلبها. من بعض الواسطة الى القناعة العامة بالشعب بصحتها. من موظفين فاسدين الى وزراء. من وزراء الى ... والا بلاش. قدام عيونا رشاوي وتهاون بالقانون وتعاون ضد البلد وشعبة... والبعض يبينا نسكت. اذا ما تكلنا هالحين متى نتكلم والكلام أضعف الإيمان. خمسة مليون منيه و200 ألف مناك وشيك عذرة لمبرة خيرية بعد ما كان ما فيه شيكات أساسا وبعدها المزيد من الشيكات وأراضي لنواب مستذبحين للدفاع عن الحكومة ورئيسها بشكل غريب غير مفهوم الا بعد ما انكشف السبب ويا ترى ليش فيه المزيد من المدافعين باستذباح ما يندرى؟ لكن الديرة صغيرة وما ينخش فيها شيء. قدام عيونا الإعلام أبدا ما هو نزيه الا متحيز كل واحد بصوب اللي مع تيار واللي مع تاجر واللي كوش عليه رئيس الحكومة. يتحدون مو على الحق أو حتى المهنية الا يتحدون على عدم تغطية الأحداث اللي تضر مصالحهم (اليوم والأمس بتجمع "لا للخرافي" ويغره الكثير)... وتعال اضرب بالشعب. قسم بلا حسيب ولا رقيب. ادعم قنوات جديدة ما همها الا الاستفادة الشخصية لمالكها الجاهل عن طريق سمع وطاعة المعازيب. اقسم بلد على نفسة حتى وان كانت بشكل مفضوح المهم البقاء السياسي. اليوم لازم نقتنع أن الأشخاص فوق القانون والظاهر فيه قانون غير المكتوب لازم نقتنع فيه. وصلت فينا بالكويت... كويت أمي وأبوي... الى محاربة الكلمة ومحاولة الإرهاب الفكري. من محمد عبالقادر الجاسم اتفقنا معاه والا لأ لي المحامي فيصل اليحيى اللي ما قال الا ضميرة بشكل قانوني وبعدها المدون حاكي عقالي ولاني مكثر عن الأخير علشان لحد يقول فزعة لربعهم. الفزعة للمبدأ مو لأي واحد من المذكورين. الفزعة للديرة مثل ما نبيها مو مثل ما حنا خايفين منها. مطلوب سكوتنا؟ ما رد لي الروح بعد غصة قبلي وأنا أشوف التعمد بتقسيم الديرة وتحريض الشعب على بعضة وجهات رسمية تلاحق ناس مو منصاغة مع السلطات كأننا بسوريا الله يعينهم على البعث الا يوم اني شفت المدونين كالكويتيين الشجعان اللي هذا هم بالفعل بوجه المصاعب جمدوا ومع بعضهم وقفوا وبوجه التخويف قالوا لأ ومع الحق وقفوا. كفوا! شيء يثلج الصدر. مو علشان الأشخاص الا علشان الرسالة توصل اننا ثابتين ان شاء الله على مبادئنا. ولو من غير دعم سياسي ولا غيره. الحق الله يدعمه والكويت لها عيالها والناس لبعضها. وللي يبي يفرقنا ويخوفنا لا تاخذ كلامي رد عليك خذ الرسالة من اجمالي المدونات. يوم انكم روضتوا أغلب الجرايد التدوين لازال حر والا الناس ليش تتجه له وحنا ليش نكتب فيه وانتو ليش مستائين منه لهالدرجة. ما نكتب لشهره والا ما كتبنا بدون أسامينا. نكتب لكشف الفساد "لو منو كان وراه". والله أكبر اذا كان هذا الل مو عاجبكم.

ياللي بتسكنا استح على دمك شوي. فكر بكونك كويتي وعيالك وعيالي بيتناصفون ديرة وحدة. فكر بالحق ترا مو عيب ولا فات الفوت. الكويت الباقية مو انت ولا أنا ولا معزبك ولا التدوين ولا شيء غير وجه الله.

اذا قرقت على راسكم شوي سامحوني. قلت استخدم الكلمة الحرة مدامها ليلحينها موجودة. وخلاصة الكلام... محد بيسكر بوزه وللحق طلابه. الكويت فوقي وفوقك والله فوق الجميع.

عاد كنت مزهب ذيك المقالة لكن مو مشكلة... نخليها لبعدين لأننا ما راح نسكت. كل هذا أصلا ما صار الا بعد ما شابه اليوم الأمس يوم طالبنا كشعب واحد متحد بنبيها خمس ("أوووه ذبحونا هذول بنبيها خمسة"). لو نساهم بكتابة الكراهية والتقسيم كان استقبلونا بمكاتب وزاراتهم لكن لكل حدث حديث فهذه مو آخر مقالة نكتبها ان شاء الله.

ولو ان العيد احساس بالفرحة مو مجرد تاريخ بالرزنامة
واللي نحسه أبدا مو عيد
الا اننا نغتصب الفرحة علشان نهنيكم
كل عام وانتوا يا أهل ديرتي بخير
لا للانقسام... تكاتفنا هو اللي مضايقهم
لا لكسر كلمة الحرية
لا نتخلى عن الكويت اللي نبيها


---
شكرا يا د.حسن (أف شلون أشكر شيعي بالوقت اللي الحكومة تبينه أسبه؟)... هكذا تكسب الإحترام والمصداقية والمودة

هناك 30 تعليقًا:

كويــتي لايــعه كبــده يقول...

تمت الكتابة سنة وحدة من غير ترتيب
يعني بشكل عفوي من القلب مباشرة
هذا حنا
وهكذا بنبقى

Anonymous Farmer يقول...

مع اني قريت البوست كله ، لكن أحلى ما في الموضوع العنوان .

يعكس الواقع .

كفى و وفى العنوان .

مو بس جذيه ، الأعياد القادمة أسوأ ، إذا راح نستمر على هالمنوال ... تدوين وحجي بلا عمل . هالكلام القصد منه مو الإحباط بل مجرد توقعات عقلانية . بالعكس ، روح عيد استانس و تعال ، صد رد .

غير معرف يقول...

كل عام و الكويت و الكويتيين بخير ، و مع إن في أزمة تحسون و نحس فيها بس لازم نكون متفائلين ، حتى لو الأمور ساءت ، فالمثل يقول : اشتدي يا أزمة تنفرجي!
عيدك مبارك ، و أحسنت

غير معرف يقول...

احسنت

Blog 3amty يقول...

العيد عليك يتبارك وعساك من العايدين الفايزين :)

حاطب ليل يقول...

مطر وخير وعيد...ابتسم:)

المقوع الشرقي يقول...

العيد عليك مبارك
كلامك من القلب
ودخل القلب
والله وجانا اليوم اللي السلطة تهدد واحد من (الشعب )لاجل عين نائب (الشعب)

..
بالقلب وايد
لدرجة البوست اللي حطيته خليته خالي
مادري شاقول ولا أقول..مالي نفس
..

بو حامد يقول...

الكلام الي يطلع من القلب يدش القلب

وموضوعك مع موضوع الزميل حلم جميل اختصار لإخفاقات ناصر المحمد

ولكن النداء ان شاء الله سيعيد الحياه

مردويسة يقول...

ولا تنسي العم بوعبد العزيز

كان اول من صرح بموضوع المدونين في المهرجان التضامني المقام في مقر معك

ونص التصريح

ونستغرب كذلك محاولة التصدي للمدونين حيث إتصل مسؤول رسمي بأحد المدونين واسمعه كلام غير عادي وهدده مما جعله يوقف مدونته فليس كل الناس لديهم القدرة على التصدي ولهذا نؤكد أننا سنتصدى لكل هذا العبث السياسي .


وشكرا

الدســتور يقول...

صح لسانك بس لازم تشكر اولا قبل التحالف
العم احمد السعدون عندما تكلم عن المدونين غي ندوة معك الاخيرة

حلم جميل بوطن أفضل يقول...

لا تتحسف على مقالك

توقف تضامناً مع الزملاء و لنرى كيف تكون البلد من غير مدونات لمدة يوم ثم ارجع بصورة اقوى من السابق

في انتظار مقالك بعد التوقف

أهل شرق يقول...

بارك الله فيك

كلامك من القلب الى القلب

فاطمــه يقول...

كل عام وأنتم بخير

ينعاد عليكم بالصحه والعافيه يارب **

q8mirror يقول...

نرفع لك العقل والقبعات,,

كلامك حقا من القلب

ابشر باخير جايك..فأنت في الكويت ولله الحمــــــــــــــــــد

تقبل مروري،،،

q8mirror يقول...

عندي سؤال::


ليش الكل متكتم على التهديد اللي تعرض له انتر كويت..قولو لنا شسالفة، ونبي دعوه منه .حنا من متابعيه من 2006

،،

ZooZ "3grbgr" يقول...

شكرا لك انت على مقالك هذا

بعد ما وصلتني صورة الغالي بو وليد

حرقت قلبي وكتبت اخر بوست

http://3grbgr.blogspot.com/2009/11/blog-post_27.html

بس مقالك هذا برد قلبي اكثر

الللي يهددون بيتمون موجودين

وبيحاولون اكثر واكثر يسكرون مدونات

وكل ما تسكرت وحده تبطلوا عشر

صوت الحق ما ينخنق

وخالد راد انشاالله




عندي طلب ممكن؟؟

ممكن تغير بالعنوان؟؟

لاني اعتقد هذي تعتبر دعوه

مو كافي هذا العيد اللي مافيه غير المطر رحمه من الله

الله لا يعيد أيام ضيقه

:/

كويــتي لايــعه كبــده يقول...

المزارع المجهول...

مبروك قمت تكتب بالعربي

التدوين والحجي لا يعني أنه بدون عمل.
التدوين هو بحد ذاته عمل لا ترغب به السلطة لما يعطي من شفافية بما يراد به التعتيم. بالإضافة فإن الدعوى الى العمل هي عمل ومن يدعي الآخرين يبدأ بنفسه بحياته العملية (;

كويــتي لايــعه كبــده يقول...

العسل الأسود...

وانت بخير وسلامة
التفاءل كل ما له ويصعب
لكن للكويت عيالها

كويــتي لايــعه كبــده يقول...

غير معرف...

لا هنت

كويــتي لايــعه كبــده يقول...

ولد أخو العمة...

وانت بصحة وسلامة

كويــتي لايــعه كبــده يقول...

حاطب ليل...

أصبحنا بحاجة الى الدفاع حتى عن الإبتسامة

الحمد لله انها من رب العالمين وليس من غيره

كويــتي لايــعه كبــده يقول...

المقوع الشرقي...

علينا وعليك

السلطة عملت أكثر بالماضي ونحن همنا تشكيل المستقبل

أنا مثلك ولكن ما فك الغصة الا الكلام الكويتي كما هو

كويــتي لايــعه كبــده يقول...

بو حامد...

النداء ليس لهم
فليس فقط أن لا لهم إحساس أو أنهم اعتادوا على تجاهله
بل أن تعارض المصلحة الشخصية على العامة بات مشروعا عاما بدون قدوة حسنة

كويــتي لايــعه كبــده يقول...

وردوسية...

شكرا على التنويه
بالفعل أنا لم أنساه لكني كتبت الموضوع بوقت سريع وذكرت ما هو أطرف الأخبار لي
أشكرك على تنبيه الجميع أنه بالفعل في مقدمة المدافعين

كويــتي لايــعه كبــده يقول...

أبو الدستور...

الشكر لجميع من عارض علنا تهديد السلطة لحرية الكلمة

أما بالنسبة للعم السعدون فلا نستغرب موقفه بل نسترب لو لم يكن الأول في الدفاع

كويــتي لايــعه كبــده يقول...

حلم جميل بوطن خالي من القمع...

لا حسافة أبدا
فالقلم لم يجف

البعض (خارج وداخل التدوين) يتمنى التوقف أن يستمر الى اللا نهاية واتوقع سخرية علنية في يوم توقفنا والله أعلم. لكن لتسير السفينة

شكرا للدعم

كويــتي لايــعه كبــده يقول...

أهل شرق...

وفيك

والبعض من "البوك الى البوك"

كويــتي لايــعه كبــده يقول...

إيمان...

وانت بصحة وعافية
ومن العايدين الفايزين

كويــتي لايــعه كبــده يقول...

مرآة الكويت...

أتقبل مرورك وأشكرك عليه

العزيز حاكي عقالي له وحده الحق في الإفصاح عن ما حدث له وليس للكل وبالذات من لا يتمتعون بدعم سياسي القدرة على المواجهة لكننا نستعين بالله ونستقوى بالحق وببعضنا البعض. الغريب أنهم يفضلون التعامل مع من هم سياسيين ومن لديهم أجدندات سياسية ممكن التعامل معها... فالحق ليس أجندة ولا يمكنهم التعامل والتساوم معه.

كويــتي لايــعه كبــده يقول...

زووز...

أنا مثلك كنت غاص ومن فترة لكن بفضل الله زالت وقت الحاجة

سمعيهم خل يدرون رأي الأمة بالنسبة للحرية

أنا مو متعود أرد الطيبين
لكن فات الفوت على العنوات
ولم أقصده دعوة أبدا لكن تعبير عن حالنا عيد بعد سنة بعد سنة