18‏/11‏/2008

ويــن ربــع الفالي؟

تحديث تحت
-------------------

سؤال: الحين الكل طاير على الطبطبائي لسحب استجوابه ويدورون عن مخرج ووو وين ربع الفالي ما يحلون الأزمة من صوبهم!؟

مو ذابحينا وطنية وولاء للكويت مو لايران ووو؟ مو هذا وقتكم؟ اذا الحل بمغادرة الفالي ليش محد من اللي توسطوا بدخوله يضغطون عليه للخروج ولو كانت من غير قناعة لو علشان الكويت (وين التضحية؟)... والا السيد أهم من الكويت؟! السالفه عناد الا يوم الخميس؟ الحكي وايد والفعل ما ميش! واللي بيفتح سالفة الطائفية بحذفه بكرسي! هذا وقتكم يا شيعة الكويت الوطنيين.

ويا الطبطبائي لا تنزل بالتاريخ كشرارة الانقلاب الثالث على الدستور والديمقراطية. أختلف معك في معظم طرحك بالسابق والحاضر لكن أناشدك باسم الكويت بعد الله سبحانه انك ما تمشي حسب أمنياتهم وتروح فينا الى الحل الغير دستوري / غير قانوني. فكر يا بني آدم بدون عنجهية. طز بالفالي المتطرف والغريب فكر باللي أهم منه.

ضعنا بين سيد متطرف غير كويتي (قمنا نستورد المشاكل من برا) وبين ربعة اللي بس يدافعون عن نفسهم بالمظلوميات وباقي الوقت حتى ديرتهم ما يدرون عنها (ركز على كلمة "ربعة" قبل لا ينط لك عرج) وبين متدينين شواطيء العراة وتسجيلهم للنقاط وبين شيوخ ناطرة الأزمة من الله لأهدافهم القديمة (طبعا مو كلهم) والحكومة... أي حكومة؟ عندنا موظفين برواتب عالية ومميزات على أفا الدولة أما حكومة "حكومة" ماني خابر.

لك الله يا كويت

ربع الفالي كاهم:...
صالح عاشور: الفالي لن يغادر البلاد قبل يوم الخميس المقبل .. (كفو ياللي حطيت الكويت أول)
القلاف (اللي حلف ما ينزل انتخابات احتراما للعمامة وبعدين لعن ربعه وتوعد فيهم يوم القيامة) يطالب بحل المجلس (نعم لتسجيل النقاط. ترا احنا حلينا المجلس! الاولويات طيبة عندك)
المشكلة انكم تمثلون ناس. الناس اللي صوتت لكم. يعني فكركم هذا مو بس في روسكم.
كل هذا علشان
باقر سيد احمد راغب زاده؟

من يزيد...
من يزيد...
في حراج الخراب


هناك 36 تعليقًا:

KQ8 يقول...

شوف اليوم الفالي باجر البالي واللي عقبه ترلالي وقول ماقلت وسكوووت هنصور

honey يقول...

أفااااااا ما عرفت الشخص اللي أقصده
p;

المهم ما تعتقد أن مضوع الفالي مجرد تشتيت لعقول الناس عن قضايا أهم
و زيادة الفتنة لينشغل الناس بصراعات لا مغزى منها

الفالي بالابتعاد عن كونه سني او شيعي حتى لا نبدا بحديث التطرف " اللي أيدك لو فلعت أحد بكرسي على راسه " هو مواطن غير كويتي و منهجية في الطرح متطرفة باسلوب شوارع
فهل هو بيل قيتس لنتمسك فيه ؟

آسفة على البيرة بس شسوي هذا اسمها ابيتنا، بس شدعوة لو تحط صورة بطل خمر هم السمعة مصانه و لا تمس " مشاءالله"

بس يقول...

لج الله ياكويت

:(


الله المستعان

enter-q8 يقول...

يقول
حلوا المجلس و علقوا الدستور
علقوك بساحة الصفاة امين يالقلاف

kuwaiti_cool يقول...

المصيبه انهم كانو ضد استجواب المليفي وقالو مو وقته واليوم قلبوا

عمار يا كويت الماضي يقول...

يالله سترك أستر علينا

غير معرف يقول...

المشكلة ليست بالفالي


المشكلة بالحكومة التي تعاطت الموضوع وكانة شي عادي

مع الاسف حكومنتا عاجزة وتغلط والعقاب يصير على الكويت

يـا سْـديـرَه يقول...

السؤال : من اللي طق الصدر للفالي وخلاه يدخل البلد وفي قضية تنظر ضده ؟؟
صدقني اللي دخله عارف ان السيناريو اللي احنا فيه كله بيصير وعارف ان السلف ماراح يعدونها !!

المشكلة ان السلف طق لهم عرج حزة استجواب المليفي وما يجوز ووضع البلد ما يسمح !! الحين الإستجواب صار حلال يومنه صار منهم !! اقول وين راح وضع البلد؟؟

اخيي وكأن في احد متعمد انه يفتعل امور في سبيل تهيئة الجو لحل مجلس الأمة
وغير هذا كأنه يهيأ الشعب الكويتي واللي اغلبه مقاد من القبيلة والا توجه والا مذهب للأسف الى قبول حل مجلس الأمة ويحاول يعيشه حالة من التذمر والسخط من جو الديمقراطيه !!

يعدين اشفيه القلاف ؟؟ احد يفهمني !! اشلون رجل يفترض فيه انه برلماني يتكلم ويقول وآنا سامعته على قناتين انا ابي من الأمير يحل المجلس حل غير دستوري @@ !!!! غير دستوري؟؟؟
من صجه والا يتغشمر ؟؟ هزززززلت !!

_______
اخي جم مره ادخل مدونتك ويطلع لي بوست الدستور !! اتفاجأ الحين ماشاء الله اكثر من بوست يديد .. عموما ما حبيت يطوفني شي ..باس قوي قريت كل مقالاتك وعلقت

صدق من قال ان خدمة زين لووعه :(

ولد الديرة يقول...

سندباد مرفوع عنه القلم من عندي

كويــتي لايــعه كبــده يقول...

بو طارق...

والله ادري

الفالي عفوا باقر سيد احمد راغب زاده ما هو الا الشرارة المختاره هالمرة والمحاولات مستمره

صور يبا صور

كويــتي لايــعه كبــده يقول...

شهد...

تقريبا بس ما بغيت أحط بذمتي
:)

نعم اعتقد الى حد ما

باقر سيد احمد راغب زاده عند البعض 2 بيل قيتس وواحد فلافل

شكرا شكرا بس صور الخمر نخليها للحكومة في تصوير الدواوين (صج ما يستحون! يعني هم ما عندهم دواوين!؟ اذا هم يلكونه بدواوينهم والله أعلم مو كل الناس واطية! الحمد لله والشكر)

كويــتي لايــعه كبــده يقول...

بس...

الكويت من لها غير الله ؟!؟!؟

حكومة قلبها على البلد مثلا؟!!
والا شعب يفهم مصلحته وما يطالب بتعليق دستوره؟!!!
والا سلطة تحط البلد قبل مصالحها؟!!!
والا دينين مو نصابين (المطير)؟!!!
والا شيعة بس يتظلمون وبالصوب الثاني يفضلون سيدهم على الكويت؟!!!

ما لنا الا الله سبحانه

كويــتي لايــعه كبــده يقول...

بو وليد...

عاد افهمها يبي يقول قدرنا على دستور وحلينا مجلس امه

تبي هالخبل (والا نسينا حلفة بلعنة من لم يصوت له بانتخابات مجلس الامة يوم القيامة عند جدته؟) يفضل الكويت على سيد؟ لا قدر الله لا قدر الله

باجر يلحن لك مظلومية واليوم يقول لك السيد أهم من الكويت

الرك على الخرفان اللي تسير وراه

كويــتي لايــعه كبــده يقول...

صباح الناصري كول...

اللي اختشوا ماتوا
وبقى لنا بس النصابين

هذاك مو وقته وبنفس الشهر استجواب اتفه منه وهز البلد اكثر منه ويقولون للناس اذا هالاستجواب وصل الى الحل فاليكن

يا شين الكذب من الديّن

كويــتي لايــعه كبــده يقول...

هدام يا كويت الحاضر...

نفس اللي قلته للاخت العزيزة بس

كويــتي لايــعه كبــده يقول...

حسافتج يا كويت...

ذبحتوني،،، انت متحسف على الكويت والعزيز عمار يا كويت الماضي وأنا لايعه جبدي

يا الله على الديره اللي تييب الحارج

بيكفرونا بديرتنا... بس حامض على بوزهم!
حنا عيالها
وما لنا الا هي
وعنيدين
ولا يهمنا احد
وما نمل

دستورنا ما تجيسونه !
الرجال تعبت على جابته !
وحنا محنا هادينه !

كويــتي لايــعه كبــده يقول...

يا سديره...

اتفق معك 100%

والقلاف خليه عنك
ما هو الا نكته بايخه
حدها بايخه

وحياك الله في التعليق على البوستات السابقه
يسعدني لما اشوفك تعلقين عندي


ناطر خدمة شركة الاتصالات الجديده على أحر من جمر وخلي شركة الخرافي وعلي الخليفة تلهم تراب

كويــتي لايــعه كبــده يقول...

ولد الديره...

حتى السندباد الكارتوني كرهته يوم دريت انه من بغداد مثل ما تقول الاغنية

على الاقل الكارتوني تصك التلفزيون يطير اما هذا تنام تقوم ليلحينه راك على قلوبنا ويهذر بالقنوات "نبي حل غير دستوري نبي حل غير دستوري"

الله يلعن اليوم اللي شفناك فيه

غير معرف يقول...

ما تملّون؟

ما عندكم حياة تعيشونها؟

روحوا المجمعات

طلعوا البر والمخيمات

تمشوا بالممشي بمشرف

لا تقعدون 24 ساعة مجابلين النت

يمّة مو زين لكم

نظركم يضعف

سيدة التنبيب يقول...

أخي الكويتي اللي لايعة كبده مثلنا كلنا.. أحيي فيك الشعور الوطني و خوفك على البلد .. لكني أختلف معك تماما حول قصة السيد الفالي

كان واضحا للجميع أن قضية السيد الفالي ليست سوا شماعة لإسقاط رئيس الوزراء و محاور استجوابهم الذي قدموه خلت من قضيته رغم أنها كانت الشرارة ..

وبالنسبة له فأسلوبه ليس جديد و منذ عشرات السنوات يتكلم بنفس الأسلوب فلم يتهمه أحد إلا بعد أن ابتلانا الله بما يسمى ثوابت الأمة مستغلين الدين لتحقيق أهدافهم السياسية .

لم يجب أن يكون التنازل من ناحية ربع الفالي كما تسميهم ؟ مسألة الفالي فرعية و ليست لب الموضوع .المسئولية يتحملها من قدم الاستجواب و ليس المقيم الإيراني الذي دخل البلاد قاصدا حج بيت الله

غير معرف يقول...
أزال أحد مشرفي المدونة هذا التعليق.
كويــتي لايــعه كبــده يقول...

تم تعديل تعليق أحد المداخلات الغير محترمة من شخص كتب بأسم "كويتي لايعه كبده" واعادة نشر ما كتب لكن بدون المصطلحات المنحطة...

(مع كامل أسفي للاخوان والأخوات بالذلت عن ما حدث)

***
أنا بدوي ـــ ـــــــ

آنا وصخ

أنا كانوا ــــــ ورا المحول اللي بالنسيم

ألحين صرت رجال وسويت لي مدونة

أحيييه

احييييه

أحييييييييييييييييه

آآآخ يا ــــــ
***

كويــتي لايــعه كبــده يقول...

حسينة اللي تكت الفال وتقرا الفنجان...

اختي حسينة... بلا والله نمل ونزهق بعد
بس ما يصير نقعد مكتفين الأيدي ومحد بالكويت يسوي او يقول شيء

عندنا بفضل الله حياة نعيشها وعائلة نداريها وعيال ولله الحمد نصرف عليهم لكن هذا ما يمنعنا ان نهتم بديرتنا بل العكس هذا يحثنا زياده على انا نهتم باللي يصير بالبلد أكثر فأكثر

توني راد من أحد المجمعات وديت اليهال يلعبون وعشيناهم وشرينا شوية أغراض... لكن النصيحة للروحة للمجمعات من غير حاجة ما هي نصيحة يا اختي

بالويك اند نروح المخيمات بس ترا حتى هناك خبرج في انترنت :)

وممشى مشرف ما اتحمل بعض حركات الشباب والشابات فيه

مشكوره على خوفك علينا عسى عمرك طويل لكن حنا خوفنا على البلد كله وعليك انتي وعلى كل اهل الديره الطيبين

حياك الله في مدونتك

كويــتي لايــعه كبــده يقول...

سيدة التنبيب...

أهلا بأختي المحترمة

اتفق مع معظم ما تفضلتي به:

نعم الفالي شماعة ومقصود به رأس ناصر المحمد

ونعم ثوابت تزدهر بمثل هذه الاجواء العفنه... لكن ما وضحته هذه المرة بالفعل صحيح وبالفعل حدث. التطرف من الناحيتين أو أي ناحية أخرى مرفوض لأنه يهدم لا يبني ويفرق لا يجمع. بالسابق كان لنا الفخر بالنقد لهذا التجمع وافراده واليوم الفخر بالنقد للمتطرف الفالي بنفس النفس

مسألة الفالي نعم فرعية بالنسبة للصورة الأكبر وهي الانقلاب على الدستور بأكمله لكن ما المانع من ان يساعدونا "ربع الفالي" من تحقيق الفائدة الكبرى من ناحيتهم؟ أنا اناشدهم واتوقع منهم العمل على مصلحة الكويت واذابة الموقف من ناحيتهم وهذه ليست بتنازل. الفالي فرد لا رمز للطائفة كي يعتبر خروجة صفعة لشيعة الكويت. نتمنى من أخواننا الشيعة المساعدة في وضع المصلحة العامة قبل الخاصة ولا أرى هذا كثير عليهم. ولم اتوقع منهم الا ما اتوقعه من كل و أي كويتي محترم لا أكثر ولا أقل.

بالمناسبه لا يقصد بـ"ربع الفالي" الشيعة بالكويت وهذه حساسية زائدة بوجهة نظري. ربعه هم من يتبعه كان على حق ام باطل. ربعه هم من توسط له بالدخول. ربعه هم من يفضل ان يرى الكويت تتمزق بدلا ان يقترح على الفالي ان يرحل. ربعه هم من يقف مع الفالي الايراني قبل الكويت الأم. الفالي والقلاف ومن على شاكلتهم لا يمثل الغالبية من الاخوة الشيعه مثل ما لا يمثل هايف والبذالي الغالبية من السنة.

وبكل الحالات هذا النقاش كله على بعضه جانبي ويلعب بملعب من كان خلف الكواليس ويريد هذه النزاعات ان تحصل.

أختي المحترمة حياك الله
وأثريتي الحديث دون أي مجاملة

كويــتي لايــعه كبــده يقول...

الكائن الحي من سمى نفسه "كويتي لايعه كبده"...

اولا الاسم الانسب لك هو "كويتي (يمكن مو أكيد) يلوع الكبد" بدلا من اسمي انا

ثانيا سبحان من خلق وفرق فهناك الاخت المحترمة "سيدة التنبيب" وطرحها المرتب... ثم هناك "انت"

ثالثا هل وجودك يعتبر ردا على "وين ربع الفالي"؟ اتمنى لأ فأنت عار على جماعتك بدلا من ذخر ( اعذرني ما اعرف الترجمة الى الايراني والا ترجمت لك)

رابعا شيء ضريف انك تدل المحول اللي بالنسيم وتعلم جيدا ما يحدث خلفه

خامسا نعم انا بدوي والبداوة علمتني اللي انت ما راح تعرفه وأهلى البدو ربوني باللي أهلك ما ربوك عليه بدليل اسلوبك

سادسا نعم رجل وغصبا على الشعر اللي بين حواجبك والدليل اني ما راح أحمل الاعزاء من الشيعة فعل غبي من واحد مثلك

سابعا اشكالك لن تمنعني من ترك التعليقات مفتوحه للكل وسماع كل الآراء بشفافية وحرية التعبير "المحترمة". أدري بديت أغزر على عقلك المحدود لكن لم أجد المرادفات بلغة افتح يا سمسم لهذه المبادئ

ثامنا ... والا كافيك...

أعتذر للقراء جميعا ما حدث من السفهاء منا واعتذر للأخوات بالذات كما اعتذر للأعزاء من الشيعة من فعل هذا الشاذ

bo bader يقول...

كويــتي لايــعه كبــده

الحمدلله اللي لحقت ومسحت كلام هالقذر اللي ما يمثل إلا نفسه .

تهجمه دليل ضعفه ودليل قوة حجتك ، فاستمر ولا يهمك مثل هالأشكال .

تحياتي

موظف حكومة يقول...

حكومة مع الاسف ضايعة و مو عارفة وين الله قاطها

امحق إدارة

بس لإحقاق الحق
الطبطبائي ما اعترض علي توقيت المليفي
و كان مؤيدة

غير معرف يقول...

صدقت!

Kuwait يقول...

أهم الشي الي صافين معاهم :\
مالت على الباميه D:

كويــتي لايــعه كبــده يقول...

بو بدر...

مثلك ناضج وفاهم ان هذا ما يمثل الا نفسه بالفعل

اشكاله ما تهم احد اساسا فمستمرين ان شاء الله

حياك الله بوبدر
عزيز وغالي

كويــتي لايــعه كبــده يقول...

موظف حكومة...

الحكومة مو ضايعة... الحكومة ضاعت بحكم تخبط وتعارض التعليمات اللي تجيها

امحق ادارة بالضبط!

ونقطتك في مكانها عن تأييد الطبطبائي لاستجواب المليفي ولا اعتراض على توقيته

شكرا للإضافة

كويــتي لايــعه كبــده يقول...

غير معرف...

أشكرك

كويــتي لايــعه كبــده يقول...

كويت...

عاد أحب البامية :)

بس ما عليك منهم...
لي رفست البالوعة لازم تطلع حشرات (مكرم السامع)

جنون إحساس يقول...

راح فوفو اليوم روحه بلا رجعه ان شالله ..
آنا اشوف القضية من مسألة دينية قبل كل شي, واحد ساب الذات الإلهية تتشاورون عشانه بعد؟
الدين أولاً والوطن ثانياً

كويــتي لايــعه كبــده يقول...

جنون احساس...

روحة بلا سلامة

انا ما تشوارت لكن هناك من يُرعى خلفه دون عقل

غير معرف يقول...

Why Maachla :)

Why leave your couch when ur craving one item RIGHT this second!?
Why spend hours stuck in traffic, honking and yelling, while heading to the grocery store?
Why waste time searching for a place to park?
Why wait in the queue when u don't have to?
Why get stuck in traffic AGAIN heading back home? (honking and yelling once again)

Just order your "Maachla" from www.maachla.com from the comfort of your home!
Or call 22 986 222.
You can even simply email your shopping list to info@maachla.com and we'll do the shopping and delivery for you!

Thank you :)

Give it a try..