قــول وفعــل

خلكم من الكلام المصفف وشوفوا المواقف الفعلية... ترى الكلام ببلاش.

اللي نائب سابق شوفوا آداءه واللي ما كان نائب شوفوا تاريخه والكل له تاريخ ما قبل المجلس.

الديرة صغيره والكل يعرف الثاني أو يعرف اللي يعرفه. لا ينقص عليكم.

واللي مو كفو لا تعطيه لأنه عطاك فلوس باجر يطلع اللي خذيته من جبدك. ولا تعطي اللي يعرف الأهل والا اللي من قبيلتك اذا ما يستاهل ما يستاهل وانت ادرى. اللي يخدم الديره يخدمها كلها وانت وعيالك مستفيدين ان شاء الله واللي يخدم نفسه على حساب الديرة تراك انت اللي خربت البلد عن طريقه وخربته على عيالك. شتسوى عليك خلص لك معاملة والا ضبطك بوظيفة؟ الديرة الحين ما تعجب غيور بسبب اللي صار بالماضي لا تزيدونها على نفسكم. ترانا مو ناقصين.

ونكته انتخاباتية نلطف فيها الجو المكهرب...

مطيرية متزوجه حدسي بخيل. طلبت منه فلوس. ما عطاها. كتبت على الجمس ماله "عاشت أسيل" :)

(مع كامل احترامي للمطران لغشمرتنا الأخوية و... بس :) )

بالنهاية...

اتمنى التوفيق لكل المرشحين ومن أي تيار كانوا بشرط أن يهدفون للمصلحة العامة ويحاربون الفساد وهو أساس مشاكل الكويت. لا يهمني ان كان هذا المرشح إسلامي (لله لا لحزب) فكلنا مسلمين ولا اذا كان ليبرالي فهمنا ليس حزب معين بل البلد. ولا يهمني اذا كان بدوي والا "حضري" فكلنا أصحاب أصل وكلنا متحضرين ولله الحمد. الوحده الفعلية هي عدم رؤية الفروقات وفقط رؤية بلد يشملنا كلنا ومصلحته التي هي مصلحتنا. أتمنى لكل الوطنيين النجاح وان لم يكونوا من اختياراتي. النجاح للكويت ان شاء الله.

هدية:

انظر الى أعلى الجانب الأيمن من المدونة تحت عنوان "مصادر انتخابية ممتازة" للتعرف (1) على المرشحين المختلفين من سير ذاتية ومقابلات شخصية صوت وصورة وأيضا (2) لمعرفة معلوماتك الشخصية لعملية الانتخاب.