28‏/01‏/2009

آســف وشكـــرا


بعد محاولات عديده من الدولة يالله يا دوب فهمت انّا حنا سبب تخلف البلد وكل المشاكل اللي فيه. أبي أشكر وزارة الداخلية للاهتمام بأساس المشاكل بالكويت وهي المدونات. مو البوق ولا التنفيع الأشكره ولا المحسوبيات داخل الجهات الحكومية وعدم المهنية. ولا الفساد ولا الفداوية ولا الجرايد أو أصحابها آو أهدافها. خل أوقف هنيه لأن السالفه راح تطول لو أكمل.

لكن فعلا فتّحت وأكتشفت انّا حنا طلعنا فاهمينها غلط من أساس وقبل لا أكمل أبي أعبر عن أسفي للحكومة. الرسمي منها والخفي من مادري منو فوق لي اللي يصبون شاي بالوزارات (والمدراء اللي يشتغلون لحسابهم).  وأقر ان كُل شِي زِين. البلد بخير. حنا اللي نروج اشاعات من غير مسؤولية. ماكو فساد وماكو بوق أبدا. الرياضة ما وقفوها بتعمد وشعر أحمد الفهد حلو. ادارة البلد ممتازه وما رجعتنا قري. اليوم حنا أحسن من السبعينات والثمانينات وأي نينات غيرها. استاد جابر كل ويك اند يلعبون فيه والمقاول الخرافي نفذ المشروع بالوقت والمعايير. أصلا الخرافي نفذ كل مشاريع الدولة بأمانه ومهنية ومو تنفيع وعدم الحساب. عفوا وزارة الداخلية أبي أعتذر اذا نطقت "الخرافي" من غير "صاحب السمو" قبلها فهل هذا مسموح؟ أبي أعترف أن حنا اللي نتبلى على انجازات الحكومة اللي ما تحصى. أعترف أن الشفافية مفهوم غربي من مفاهيم الكفار وماني عارف شلنا فيه. وما وصلت بالناس الشك فيكم يا حكومة انكم متعمدين انكم ما تحاولون بحل الازمة الاقتصادية (اصلا ماني عارف هذه شنو بس سمعت ناس يقولنها وقلت استخدمها اليوم) علشان تتعذرون فيها وقت حل المجلس اللي تبونه من عرفناكم. ثقة الناس فيكم ما في أحسن منها الا ثقها بآداءكم. ويمكن رشدكم مو كله يقولون الحكومة الرشيدة الحكومة الرشيدة؟

-الاقتصاد بخير
-الخدمات كلها ممتازة. الأمن ومحد مات من الصحة والاعلام قوي والتعليم آه يا التعليم ووو
-الجدول لأعمال الحكومة واضح مو بس الخطة الخمسية الا الخمس ميه
-حرمة القانون مصانة
-حاميها مو حراميها
-علي الخليفة مو حرامي وجريدته ما تضرب بالبلد ليل نهار
-محمود حيدر ما دخل السياسة من باب التجارة ولا له حليف سياسي كبير
-الشوارع مو زحمة وخططكم للتطوير عال العال
-خمس حكومات بثلاث سنين يعتبر استقرار سياسي على كيف كيفك (طبعا ما أتجرأ أنطق "ناصر المحمد" لأن أمور البلد العليا ما تعني الشعب البسيط)
-حكمتكم اللا فانية مسوية لنا خطط (جمع) بديلة للنفط لي خلص بعد مليار سنة حسب تصريحاتكم وضد الاستغناء التدريجي عنه وتذبذبات اسعاره
-وخلف دميثير ما عنده سالفه ما قبل يدخل بحكومتكم وما هي دليل على الافلاس اللي وصلتوه
-وماكو اي نية لتعليق مجلس الأمة
-كل شيء زين

مشكلة البلد الوحيده هي أن الناس طفح عندها الكيل واتجهت الى المدونات للقراءة بعد ما فقدت الثقة في الاعلام الرسمي والتجاري وللكتابة للتنفيس عن خوفها على ما تبقى من البلد. المشكلة هي أن من يكتب في المدونات (في أغلب الأحيان) مو ماخذ اذن من أحد منكم. المدونات هي المشكلة وهي سبب توقف التنمية بل والرجوع الى الخلف. أف يا هالمدونات اللي خربت الديرة. مو انتو. لا حشا والحشا عن ألف يمين. الكلام عن السرقات هو المشكلة مو السرقات نفسها. اللي يكشف حركات نواب والا وزراء من ربعكم هو المشكلة مو تجاوزاتهم وجمبزتهم. 

أشكركم على توضيح اولوياتكم. طول هالفتره وانا على بالي البلد فيها مشاكل طلع التدوين والشفافية المفروضه معاه هي المشكلة الوحيده. البعض من الأخوان والخوات قالوا حامظ على بوزكم واللي قال عشم ابليس بالجنة... أنا ما ليش دعوه بيهم يا سعادة الباشا. أنا أقول شكرا.

بعد ما اقتنعت بأخطائي بروح اصلحهم. بعد اذنكم وراي هوسة براس العاير. مو هذا اللي تبيه الحكومة الرشيدة؟


هناك 34 تعليقًا:

bo bader يقول...

أكيد مسخن وحرارتك فوق ٤٤ !!

يبيلك ابرة الخطيب ضروري وأنا اخوك ...

تحياتي

Eng_Q8 يقول...

هذي الحقيقه المره احنا سبب البلاوي

أبو لطيف يقول...

والله والله والله

توني اشوف بوستك (مقالك مو البوسة )

انا عفست السالفة ونزلت بوست كلش مو زين

ما عندي خبر بكل اللي قلته

شسوي الحين ؟

يمدي ؟

آآآآآآآآآآآآآآآه كبيرة يا الحبيب

حفظك الله ورعاك

الأستاذ حمام يقول...

احنا السبب.. لاننا لا نعرف معنى المعارضة..

شكرا على الموضوع

Q8EL5AIR يقول...

اي والله احناالسبب !!

وانا بعد اقول " اسف وشكرا " للحكومة وللقائمين على البلد ..

وحقكم علينا ومسحوهه بويهنه :)


وتحياتي ...
ويسلمواااااااااااااااااااااا :)

enter-q8 يقول...

اقول انطري بحسن اقرع و البس دشداشه قصيرة و نعال باتا و اهوس و ياك

well_serviceman يقول...

قواك الله اي كويت... الظاهر نفس ماتقول.. الكلام عن السرقات هو الجريمه وليست السرقات نفسها.. الله يعين انشاءالله

يعطيك العافيه

honey يقول...

علامك قمت اتهذي!!

أي ديرة هذي اللي اتكلم عنها بعيش عندكم شكلها خوش ديرة القانون ماشي و الإقتصاد مو متأزم و اهم شي ما عندكم زحمة

بس عطني عنوان ديرتكم و انا أنتقل لكم

ولد الديرة يقول...

الحين عرفت ليش كان ابوي الله يرحمه يقول لي

"انت ساس البلا" !

Unknown يقول...

Well well well……… I love your new style of extreme sarcam

The truth shall prevail……….I think !!!!

Blog 3amty يقول...

سامع عن توارد الخواطر ؟


هذا اللي أنت كاتبه يمونة توارد قهر وحسرة على حال الديرة ..


قواك الله :)

شقران يقول...

العزيز كويت لايعــه كبـــده

مساك الله بالخير


اقتباس
لأن أمور البلد العليا ما تعني الشعب البسيط


أعلق واصفق..أعلق واصفق (يازيدان الكويتي) على هالتمريره الصعبة والمحترفة جدا جدا جدا....وعلى هالدرر اللي كتبتها في موضوعك ومنها هالجملة اللي اقتبستها


والله من وراء قصدك وقصدي


--------------



ياغالينا كويتي لايعـــة(ن) كبده...اتضح أن التدوين هو سبب مشاكل البلد...اتعلم لماذا؟

أنت أجبت على السؤال في الموضوع وهو التالي

المشكلة هي أن من يكتب في المدونات (في أغلب الأحيان) مو ماخذ اذن من أحد منكم

انتهى الاقتباس


هذه هي العلة التي لم يجدوا (ولن طبعا) لها حل...نعم ياسيدي..لقد حسبوا أن المدونين و التدوين يشبه رؤساء التحرير و .......الصحف!!؟؟


-------------


ضحكتني جملة ولكن ماني قايلها...تعتبر تدخل في نيو ستايل مال بعض الناس....اشفيها الجدايل..حلوة ومــنــــتـــــــازة...بعدين يمكن الرجال ماشي مع الاستايل الايطالي أو
ربع خوسيه بن فيرداسكو
:)))






تقبل مني وافر الاماني الطيبة


المحــــــــــــب

شــقــــران

p:

بنت الشاميه يقول...

يعنى اذا سكتونا بينصلح الحال..!!!ء

عيل خل نسكر مدوناتنا كلنا
من اجل مستقبل بااااهر واصلاح دائم

الله الحافظ

كويــتي لايــعه كبــده يقول...

بو بدر العزيز...

أبدا
حرارتي علاقتها عكسية مع سعر النفظ

والمسألة حاليا روتين طبيعي وهذه هي ابو المشكلة ان الوضع المزري اللي حنا فيه "طبيعي"

بعدين كيف تذكر "الخطيب"!؟

انت ما تدري انه من المغضوب عليهم ومن أكبر المحرضين للفساد والعصيان ومن اسباب خراب الدولة!؟

الله يهداك بس

كويــتي لايــعه كبــده يقول...

مهندسنا مو مهندسهم...

وهم سبب الرخاء اللي حنا فيه

كويــتي لايــعه كبــده يقول...

أبو لطيف اللطيف...

انت اصلا بدعواتك للهدوء والتسامح ساس البلاء!

كيف هم يجتهدون بـ"فرق تسد" والتأزيم وشحن الشارع وانت تهدي الناس!؟

انت مخرب

كويــتي لايــعه كبــده يقول...

أستاذي حمام...

"اننا لا نعرف معنى المعارضة" تحتاج مقالات للتعمق بها مو تقليق على الطاير

الشكر لك

كويــتي لايــعه كبــده يقول...

خير الكويت لغيرعا...

الله يسلمك يبه

اي "حكومة" وأي "قائمين على البلد"!؟

البلد داش بغرازة والسليتر معلق ومحد ماسك السكان !

كويــتي لايــعه كبــده يقول...

بو ولاد...

باجر انت رئيس مجلس الامة
وانا على الاقل وزير

والملايين (وبحالتك المليارات) مكتكته!

كويــتي لايــعه كبــده يقول...

well well well...

الله يعافيك ان شاء الله

أي سرقات؟ أحمد الفهد وعيالهم ووربعهم؟ أنا ما قلت! انت اللي قلت. لا تحط بحلجي كلام كا قلته الله يسامحك

كويــتي لايــعه كبــده يقول...

شهد دهب دهب...

الديرة هذه اسمها "مو الكويت"

كويــتي لايــعه كبــده يقول...

ولد أي ديره...

أبوك الله يرحمه كان فاهمها مبكر
حنا توها توصلنا

كويــتي لايــعه كبــده يقول...

بلوق يدتي...

الله يقويك

على هالحال الردي اللي حنا فيه يكون توارد الحسرة والقهر أسهل كا يمكن

كويــتي لايــعه كبــده يقول...

mosan squared...

What sarcasm ?1
:)

When the truth does let me know

Man we all tried so many different ways to get the picture across to em but they simply like it the way it is! We tried calm talk and humorous and frustrated and so many other ways... and no I don't think sarcasm will work with them either. I just wrote what went through my mind and how I felt. You have no idea how much I wish I actually believed everything literally!1

كويــتي لايــعه كبــده يقول...

وضحان...

مساك الله بالنور والايمان وحب السلطة

ترى تمريرة وحدة ووراها تعرجبت
وما عندي أي قصد لا توهقني أنا أشوف "كُل شِي منتاز"

والتدوين ما هو عدد محصور واشخاص محدوده ممكن "تحييدها" و"تتوبكها" مثل الجرايد وملاكها وكتابها
طبعا يبون يشوفون لك صرفه. على كل هالملايين اللي قطوها على "الصحافة والاعلام" تجي انت وأهل الكويت وتكشفون اللي هم دفنوه بفلوس الدنيا !؟

"يمكن الرجال ماشي مع الاستايل الايطالي أو ربع خوسيه بن فيرداسكو"
أو عنزنا قبل
بس على الاقل عنزنا ما ضرت أحد



الــلايعه كبده/

كويــتي

كويــتي لايــعه كبــده يقول...

بنت أجاويد الشامية مو اللي فازو بمقعدها...

أسكر المدونه وأحذف اللاب توب من الدريشه

بس هم يبطلون بوق؟
والا يبون يبوقون بس حنا ما نتكلم؟

قبل التدوين الديرة كانت ورد يمين ويسار حسب ذاكرتي

موظف حكومة يقول...

ما اقول إلا

ناصر رئيس وزرائنا
ما صار لنا مدة عرفناة

ما تصلح تهويسة ...

كويــتي لايــعه كبــده يقول...

موظف السلطات العليا...

هو ما يصلح

Unknown يقول...

where r u ?

كويــتي لايــعه كبــده يقول...

mosan mosan...

Thou art here O' Romeo
:)

in reading mode


thanx for asking

Barrak يقول...

احنا المشكله


وبس

Q8Sky يقول...

"وشعر أحمد الفهد حلو"

انزين وشلون القبعه اللي لبسها؟

كويــتي لايــعه كبــده يقول...

أوباما...

شفت شلون

طلعوا مظلومين
ما باقوا ما افسدوا ما سووا شيء

حنا اللي نتبلى عليهم

كويــتي لايــعه كبــده يقول...

سكاي غبار...

فاشن لا يفقهه الا علاة القوم طبعا

ولا يجوز لنا الكلام عنهم
أطال الله بعمارهم جميعا الحرامي قبل المو حرامي