آســف وشكـــرا

بعد محاولات عديده من الدولة يالله يا دوب فهمت انّا حنا سبب تخلف البلد وكل المشاكل اللي فيه. أبي أشكر وزارة الداخلية للاهتمام بأساس المشاكل بالكويت وهي المدونات. مو البوق ولا التنفيع الأشكره ولا المحسوبيات داخل الجهات الحكومية وعدم المهنية. ولا الفساد ولا الفداوية ولا الجرايد أو أصحابها آو أهدافها. خل أوقف هنيه لأن السالفه راح تطول لو أكمل.

لكن فعلا فتّحت وأكتشفت انّا حنا طلعنا فاهمينها غلط من أساس وقبل لا أكمل أبي أعبر عن أسفي للحكومة. الرسمي منها والخفي من مادري منو فوق لي اللي يصبون شاي بالوزارات (والمدراء اللي يشتغلون لحسابهم).  وأقر ان كُل شِي زِين. البلد بخير. حنا اللي نروج اشاعات من غير مسؤولية. ماكو فساد وماكو بوق أبدا. الرياضة ما وقفوها بتعمد وشعر أحمد الفهد حلو. ادارة البلد ممتازه وما رجعتنا قري. اليوم حنا أحسن من السبعينات والثمانينات وأي نينات غيرها. استاد جابر كل ويك اند يلعبون فيه والمقاول الخرافي نفذ المشروع بالوقت والمعايير. أصلا الخرافي نفذ كل مشاريع الدولة بأمانه ومهنية ومو تنفيع وعدم الحساب. عفوا وزارة الداخلية أبي أعتذر اذا نطقت "الخرافي" من غير "صاحب السمو" قبلها فهل هذا مسموح؟ أبي أعترف أن حنا اللي نتبلى على انجازات الحكومة اللي ما تحصى. أعترف أن الشفافية مفهوم غربي من مفاهيم الكفار وماني عارف شلنا فيه. وما وصلت بالناس الشك فيكم يا حكومة انكم متعمدين انكم ما تحاولون بحل الازمة الاقتصادية (اصلا ماني عارف هذه شنو بس سمعت ناس يقولنها وقلت استخدمها اليوم) علشان تتعذرون فيها وقت حل المجلس اللي تبونه من عرفناكم. ثقة الناس فيكم ما في أحسن منها الا ثقها بآداءكم. ويمكن رشدكم مو كله يقولون الحكومة الرشيدة الحكومة الرشيدة؟

-الاقتصاد بخير

-الخدمات كلها ممتازة. الأمن ومحد مات من الصحة والاعلام قوي والتعليم آه يا التعليم ووو

-الجدول لأعمال الحكومة واضح مو بس الخطة الخمسية الا الخمس ميه

-حرمة القانون مصانة

-حاميها مو حراميها

-علي الخليفة مو حرامي وجريدته ما تضرب بالبلد ليل نهار

-محمود حيدر ما دخل السياسة من باب التجارة ولا له حليف سياسي كبير

-الشوارع مو زحمة وخططكم للتطوير عال العال

-خمس حكومات بثلاث سنين يعتبر استقرار سياسي على كيف كيفك (طبعا ما أتجرأ أنطق "ناصر المحمد" لأن أمور البلد العليا ما تعني الشعب البسيط)

-حكمتكم اللا فانية مسوية لنا خطط (جمع) بديلة للنفط لي خلص بعد مليار سنة حسب تصريحاتكم وضد الاستغناء التدريجي عنه وتذبذبات اسعاره

-وخلف دميثير ما عنده سالفه ما قبل يدخل بحكومتكم وما هي دليل على الافلاس اللي وصلتوه

-وماكو اي نية لتعليق مجلس الأمة

-كل شيء زين

مشكلة البلد الوحيده هي أن الناس طفح عندها الكيل واتجهت الى المدونات للقراءة بعد ما فقدت الثقة في الاعلام الرسمي والتجاري وللكتابة للتنفيس عن خوفها على ما تبقى من البلد. المشكلة هي أن من يكتب في المدونات (في أغلب الأحيان) مو ماخذ اذن من أحد منكم. المدونات هي المشكلة وهي سبب توقف التنمية بل والرجوع الى الخلف. أف يا هالمدونات اللي خربت الديرة. مو انتو. لا حشا والحشا عن ألف يمين. الكلام عن السرقات هو المشكلة مو السرقات نفسها. اللي يكشف حركات نواب والا وزراء من ربعكم هو المشكلة مو تجاوزاتهم وجمبزتهم. 

أشكركم على توضيح اولوياتكم. طول هالفتره وانا على بالي البلد فيها مشاكل طلع التدوين والشفافية المفروضه معاه هي المشكلة الوحيده. البعض من الأخوان والخوات قالوا حامظ على بوزكم واللي قال عشم ابليس بالجنة... أنا ما ليش دعوه بيهم يا سعادة الباشا. أنا أقول شكرا.

بعد ما اقتنعت بأخطائي بروح اصلحهم. بعد اذنكم وراي هوسة براس العاير. مو هذا اللي تبيه الحكومة الرشيدة؟